|
Varsoviae nata |
|
Homo sum humani nihil a me alienum puto. |
| Veneris die 4 mensis Julii 2008 | ||
STATUS NECESSITATIS IN MONGOLIA
Oppostiae partes reclamant effectibus electionum
Statum summae necessitatis
sive condicionem extraordinariam observandam in urbe capitali
Ulan Batar spatio proximorum quattuor dierum proclamavit die
Martis praesidens Mongoliae Nambaryn Enkhbayar. Cuius decreti
causa sint in viis huius urbis ultimis in diebus habitae
protestationes oppositarum partium reclamitantium contra effectus
electionis, qua factio regens olim communistarum dominationem
suam super civitatem novis quattuor annis prolongaverat. Quas
electiones fraudulentes fuisse oppositae partes putant.
Secundum officiales effectus electionum parlamento eligendo 43 e 76 sellis ceperunt candidati regentis postcommunisticae Mongolicae Revolutionalis Factionis Populi (MPRP), qualis effectus regimini maiorem partem vocum det in parlamento, Mongolice 'chural' nuncupato.
Oppositatae partes tamen, imprimis Factio Democratarum duce Tsakhia Elbegdorj, asseverant se maiorem partem suffragiorum re vera collegisse. Fautores eorum in vias profecti sunt et, pugnis cum biocolytis hic et illis habitis, inflammaverunt aedes MPRP necnon Palatii Culturae, ubi theatrum, museum et pinacotheca nationalis locum habent. Adorta sunt etiam ab iis castra vigilum publicorum.
Prima nocte status necessitatis multi reclamitantes reportantur a diurnariis peregrinis in viis adhuc manere, licet pronuntiatum etiam sit ignitegium sive hora observatoria, qua post 10 horam postmeridianam non liceat domos relinquere.
Scripsit Stanislaus Tekieli - 02/07/2008 00h19
|
|
