|
Varsoviae nata |
|
Homo sum humani nihil a me alienum puto. |
| Veneris die 4 mensis Julii 2008 | ||
De morbo Parkinsoniano novis rationibus curando
Primum mures morbo Parkinsoniano affecti, postquam cellulis staminalibus clonatione creatis curati sunt, convaluerunt: quem exitum studiosi magni momenti reputant, nam inde facultas oriri possit staminales cellulas singulo aegrotanti homini idoneas fabricandi, si investigationes posteriores feliciter perfectae erunt.
Nuntius in actis "Nature Medicine" recenter apparuit, manipulum medicorum Novi Eboraci a Lorenz Studer conductum apud Memorial Sloan Kettering Cancer Center, eadem methodo usum qua ovis "Dolly" nata erat, cellulas embryas produxisse singulis muribus morbo Parkinsoniano aegris aptissimas: quae in cellulas neurosas conversae et in bestiae cerebrum translatae morbi incurabilis signa magnopere deminuerunt, nulla cum corporis reiectione. Nam eaedem erant, atque hospitis cellulae neurosae.
Ex hoc constat methodos illa: muris caudae cellula erepta nucleo orbatur, qui in cellulam nucleo pariter privatam inseritur, cuius condicio ovi tantum est. Ovum deinde crescere coepit quoad blaston fit, unde cellulae ebryae amoveri possint. Cellulae illae iterum iuvenescunt, pristinum statum staminalem attingentes, unde commutatio quaelibet fieri potest, neque reiciuntur propterea quod ex eodem corpore ereptae sint.
"Idem efficere ad homines curandos perarduum est, - ait diurnariis Lorenz Studer - nam nuclei translatio in humanis cellulis minime comprobatum est."
Scripsit Herimannus Novocomensis - 06/04/2008 07h30
     |
Capsicino, id est materia illa, qua acerrime capsicum annuum sapit, dolores nulla cum damno efficaciter leniri posse putant studiosi Britanni. - 03/10/2007 20h21
Decennio 1994-2003 numerus casuum disfunctionis bipolaris sive morbi maniaco-demissivi inter pueros Americanos quadragies (40x) crevit - patet ex analysi modo perfecta datorum Sedis Statisticae Medicinalis USA (National Center for Health Statistics). - 05/09/2007 14h42