|
|
|
NUNTII 
In Ucrainia taedium belli crescit.
 In Ucrainia taedium belli crescit
Diuturnis ac damnosis proeliis commissis matres
militum iratae et cura filiorum sollicitatae
regimini reclamant dictitantes se, cum a bello ipso
abhorreant, plures in dies ad arma vocari nolle.
Passim decreta magistratuum, quibus filii vel mariti
eorum ad arma ire cogantur, comburunt viasque et castra stativa
intercludunt. Non est dubium, quin consilia magistratuum favorem
belli in contrarium verterint. Eo magis populus indignatus est,
quod magistratus nuper constituerunt vectigalia bellica civibus
imponere. Imprimis in iis regionibus, quae ab Hungaris
Romanianisque coluntur, consiliis magistratuum vehementer
repugnatur, cum mulieres his locis minime intellegant, cur mariti
sui cogantur prope urbem Donezk pugnare, quae urbs a patria sua
CM fere milia passuum distaret. Quin etiam in Bucovina, in patria
Arsenii Jazeniuk, primi ministri, quae maxima parte a Romanianis
colitur, homines iussis magistratuum repugnant, dicentes se
liberos suos istis tradere nolle. Illos potius pugnare deberent,
qui seditionem illam Maidaniam fecissent.
Novoseliciae – quod oppidum eadem in regione situm est -
res ad summum discrimen venit, cum mulieres iratae legatum
quendam offenderent capillis eum trahentes habitumque eius
Ucrainianum discindentes: “tu modo”, sic clamaverunt,
“ipse milita !” In ipsa Galicia , ubi immoderatissimi
patriae cultores inveniri solent, sedibus magistratuum
stativisque occupatis mulieres poscunt,
ut ipsi magistratuum liberi ad arma vocentur.
Summam enim esse iniuriam, quod viri ex plebe ad arma ire
cogerentur, cum filii illorum militia liberarentur.
Quamvis exercitus Ucrainianus non desinat proclamare se in
seditiosis reprimendis multum proficere, tamen tot civibus
occisis populus illis nuntiisvix credere videtur. Cum in actis
diurnis nuntiatum esset totas cohortes, dum a seditiosis
oppugnantur, commeatu esse interclusas, ratio belli gerendi magis
magisque vituperabatur. Quin etiam accidit, ut pars militum in
fines Russorum se contulerit, ut mortem certam effugeret. Ii, qui
reverterint, proditionis accusabuntur.
Quibus rebus cognitis haud rari inveniuntur, qui persuasum
habeant maximam Ucrainianorum partem taedio belli esse captos.
Scripsit
Volfgangus Austriacus - 03/08/2014 21h51
.
.
|
|
BREVES
SCIENTIAE
SOCIALIA
RELIGIO
SOCIALIA
RELIGIO
|
