|
|
|
NUNTII 
De reactorio atomico concluso in Iaponia
 De reactorio atomico
concluso in Iaponia
Die hodierno post meridiem, iam nocte ex
hora loci, reactorium atomicum Iaponicum opere fungi desiit apud
Tomari in insula Hokkaido, ultimum ex LIV quae operantia
manserant post ergasterii atomici calamitatem effectam apud
Fukushima mense Martio praeteriti anni, terrae motum et
subaquaneam perturbationem sebsecutam.
Usque ad hunc atrocem eventum electrica vis
educebatur duobus prope partibus ab officinis atomicis quibus
Regnum Iaponicum amplius quam ceterae nationes exceptis
Francogallia et Civitatibus Americae Foederatis usum est. Usque
ad hoc tempus amissio suppleta est maiore copia consumpta
petrolei, gasii liquefacti et carbonis fossilis, sed , adveniente
aestate, fieri non potest quin Iaponia vi electrica indigeat.
Opera reactorii intermissa est ut recognitio
fieret de securitate; idem etiam ceteris, quamquam non laesis,
impositum est. Opus conservationis producendum erit septuaginta
dies; quo facto, ergasterium atomicum nuntiatur ad usum iterum
posse aptari, quod tamen incertum est. Adhuc nullum reactorium ad
operam revocatum est. Vis irradians et egressiones coactae post
calamitatem effecerunt ut toto orbe sed praesertim in Iaponia
mutatio consilii a civibus de vi atomica exoriretur. Hodie
centeni, in viis urbis capitis Tokio, iter fecerunt ad
reclamandum de re. Auctoritates complurium muncipiorum iam
recusaverunt quominus officinas atomicas iterum acciperent.
Scripsit
Lydia Ariminensis - 06/05/2012 08h13
|
|
BREVES
ATHLETICA
POLITICA
IN ORBE
POLITICA
INSOLITA
|
