NUNTII

IRANIA ACCUSAT ISRAELIAM MORTIS PERITI RERUM ATOMICARUM

Num Massud Mohammadi ab Israelibus occisus est?

Massud Mohammadi, vir rerum atomicarum peritissimus, Martis die per insidias occisus est. Magistratus Iraniani dixerunt suspicionem non esse alienam Israeles aut Americanos auctores insidiarum fuisse.

Professorem Mohammadi diruptione birotae prope depositae necatum esse, cum mane autocineto profecturus esset, in televisione publica nuntiatum est. Materiam displosivam birotae affixam procul esse incensam. Fieri posse, ut plures homines ea diruptione occiderentur.

Mohammadi adversarios regiminis et factiosos partium oppositarum publice adiuvisse dicitur; nomen eius in indice quodam invenitur, quo CCXL professores duci eorum Mir Hussein Mussawi faventes continentur. Tamen Mohammadi a televisione publica „fidus adiutor eversionis islamicae“ appellatus est, qui ad annum MMIII cum “cohortibus eversoriis” collaboravisset.

Qui num consiliis regiminis ad res atomicas pertinentibus interfuerit, incertum est, quamquam magistratus internationales viribus atomicis continendis (IAEA) eum interfuisse negaverunt.

Regimen quidem Iranianum illas insidias „facinus terroristicum“ appellavit, quod ab hominibus esset commissum, qui ab imperiis mundanis mercede conducti essent. Procuratores nuntiorum Iraniani FARS sodalitatem quandam regno restituendo peregre res suas gerentem id facinus confessam esse nuntiavit. Prima eius facinoris investigatione “trinitatem malignam Zionistarum,Americanorum eorumque procuratorum” apparuisse.

Professorem Mohammadi martyrem esse, cui hostes eversionis Islamicae atque “elementa repressionis mundanae” insidiati essent.

Benjamin Ben-Elieser, minister Israelianus rerum commercialium, iam praedixerat fore, ut Israel huius criminis insimularetur: „tamen plane ignoro“, inquit, „quis facinus commiserit; nostros id commisisse non puto.“

Marcus Fitzpatrick, particeps instituti Londinensis ad rationes consiliaque belli pertinentis (IISS), dixit , quamquam prioribus temporibus nonnumquam ab Israelibus occisi essent, qui rebus atomicis studuissent ideoque pro hostibus habiti essent, se non credere has insidias ab Americanis aut ab Israelibus esse paratas, ne Irania in hac disciplina plus proficeret . nam nimis multos iam esse, qui huius rei periti essent.

Scripsit Volfgangus Austriacus - 13/01/2010 20h42

Catherine Gauchon Artiste peintre

TEMPESTAS AMERICANA

FACINUS LUTETIENSE

FOEDUS EUROPAEUM

MISSILIA RUSSICA

DE RE AFRICA

DE RE QATARENSI

RERUM NOVARUM STUDIUM

NOVA UCRAINA

CAPTIVORUM COMMUTATIO

NOVA DE BELLO

DE PERSIA

DE VERBIS RUSSICIS

DE CIVITATE ISLAMICA

POTESTAS BOREOCOREANA

DIES FESTUS PRO FEMINIS HODIE CELEBRATUR

.

.

Subnotationes fient
ante finem Septembris.