Annus
2 0 0 5

Vina Europaea in America protegi NUNTII HEBDOMADIS (11 - 17.09.2005):

COMITIA IN AFGANISTANIA

Die XVIII mensis Septembris Afgani suffragia tulerunt, ad senatum populi (Wolesi Girga) et senatum regionum (Meshrano Girga) creandos; cum prior ex CCIL senatoribus a populo eligendis constet, alter ex CII constabit, quorum tertius quisque tantum a populo deligendus.
Quartus quisque senatorum muliebris sexus erit.
XII miliones civium ius suffragium ferendi habere existimantur: ad comitia recte habenda operam dabunt res publica Afganorum (in imagine iuxta posita vehit asellus thecas suffragiis colligendis aptas) et Ordo Nationum Unitarum (ONU), observantibus legatis Unionis Europaeae et Instituti Europaei ad securitatem et operam communem (OSCE) et militibus ab Instituto foederis Nordici Atlantici (NATO) vigilantibus.
Ante comitia non defuerunt facinora cruenta neque impetus terroristarum: septem candidati obierunt, septem armati Talebani a publicis custodibus interfecti sunt, XX tromocratae in vincula coniecti sunt, pyrobola apud altissimum aggerem Kajaki, in provincia meridionali Helmand, deponentes : quorum diruptione multa milia hominum aquis defluentibus submergi potuerant. - HERIMANNUS NOVOCOMENSIS.


SUICIDIA IN NUMERIS

Maxime omnium gentium suicidio proni sunt Lithuani – patet ex investigatione a societate mundana sanitati propagandae World Health Organisation mandata, cuius inventa modo in lucem data sunt. Nam anno 2002, ultimo pro quo numeri habeantur, per quaeque centum milia Lithuanorum mortem voluntariam sibi consciverunt 80.7 viri necnon 13.1 mulieres. Lithuanos sequuntur in hoc tristi indice cives aliarum terrarum pristini Unionis Sovieticae: Russi (69.3; 11.9), Rutheni Albi (60.3; 9.3), Ucrainienses (52.1; 10.0), Kazakhi (50.2; 8.8), Lettones (48.4; 11.8), Estones (47.7; 9.8) at deinde demum prima non-Sovietica gens maxime suicidialis – Hungari (45.5; 12.2). Maxime autem felices vita sua videntur Syrii, apud quorum numerus supradictus suicidorum apud viros 0.2 per 100 milia aequatur, mortes voluntariae feminarum nullae vero nuntiantur. Item fere apud Aegyptios (0.1; 0.0), cives insulae Iamaicae (0.5; 0.2), Cuvaitienses (1.9; 0.9), Peruvianos (0.6; 0.4), necnon Philippienses (2.5; 1.7). Etiam pristinae Sovieticae gentes nonnullae montem Caucasum inhabitantes non tam saepe vitae valedictionem sua sponte dicere volunt – Azeri (1.8; 0.5), Armeni (4.0; 0.7), Georgienses (4.8; 1.2). In Europa maxime rerum suarum contenti videntur Melitani (5.6; 4.0), quos sequuntur Graeci (5.7; 1.6).
Ubique multoties saepius viri quam mulieres manus sibi inferre velle numeris statisticis monstrantur, una natione tamen excepta – apud Seres (quorum tamen nonnullis tantum ex regionibus numeri adsunt) plures feminae quam mares morte voluntaria moriuntur (13.0; 14;8). NANOMPOUPHOS


PERSAE ET VIS NUCLEARIS

Praeses Persarum Mahmud Ahmadinejad, Iovis die cum rectore supremo Turcorum Recep Tayyip Erdogan Novi Eboraci (New York) colloquens, adfirmavit rem publicam Iraniae quae de vi nucleari placide adhibenda sibi iam cognita essent cum aliis islamicis civitatibus communicare paratam esse, numquam tamen arma interneciva construxisse neve confecturam. Duo praesides in urbe Americana cum ceteris civitatum rectoribus ad conventum generalem Ordinis Nationum Unitarum se contulerant.
Praeterea dixit Ahmadinejad studiosos Persicos scientiae physicae de metallis robori nucleari liberando aptis omnia cognovisse eorumque usui paratos esse, sine ulla violatione neu Pactionis de armis nuclearibus non proliferandis neu legum in orbi toto constitutis, adsistente Instituto mundano de vi atomica (AIEA).
Moderatores Persarum recenter enim constituerunt mutationem uranii in uranium fissile resumere, postquam tres civitates Europaeae (Francia, Germania et Regnum Coniunctum) intermissionem obtinuerant; quod consilium sollicitos rectores USAe facit, qui timent ne clam arma nuclearia confici possint. - HERIMANNUS NOVOCOMENSIS.


VINA EUROPAEA IN AMERICA PROTEGI

Tandem, viginti post annos paciscandi, constitutum est inter Commissionem Europeam et regimen USA, ut prohiberetur in America usus nominum vinorum Europaeorum, nisi de vinis re vera e Mundo Veteri invectis agatur. Vinicultores enim Americani saepe vina sua, sint licet bona, nominibus generum praeclarum meri in Europa fabricati nuncupare solent, hoc modo maiorem numerum emptorum sibi allici sperantes, eodemque tamen tempore vinis Europaeis viam in mercatum Americanorum difficiliorem reddentes, nam multi ibi amatores vini, qua re differant ambo nescientes, saepisssime vilioris pretii vinum "imitatum" (id est indigenum) eligunt. Anno praeterito omnia vina Europaea ab Americanis pretio duorum miliardorum dollariorum empta esse putantur – post Europam ipsam sunt ergo USA maximus mercatus horum vinorum in orbe terrarum.
Nomina vinorum Europaeorum abhinc in America protegenda haec sunt: burgund, chablis, champagne, chianti, claret, haut-sauterne, hock, madera, malaga, marsala, moselle, porto, retsina, rhine, sauterne, sherry necnon tokaj. NANOMPOUPHOS


SOCOLATAM TUTARI CORDA FUMATORUM

Medici perscrutati sunt medicamentum corda fumatorum tutandi sanê insolitum: socolatam. Scilicet hi medici sint Helvetii. Iidem dicunt socolatâ amarâ quadamtenus impediri, ne fumatores corripiantur infarctu myocardii.
Si comedantur 40 gramma socolatae nigrae, quae sit portione cacaonis 74% (i.e. septuagenarum quaternarum centesimarum), meliores reddi parietes vasales interiores necnon statum antioxidativum. Haec consequi ex studiolo in Hospitali Turicensi facto a Germanicâ Societate Cardiologiae relata sunt.
Simul socolatâ comesâ rarius conglutinari thrombocyta.
Socolatam hunc habere ad fluxum sanguinis effectum salutarem per plus octo horas investigatores dixerunt. Quem effectum ex eo explicari posse, quod substantiis antioxydantibus (quales essent polyphenola) cacaone contentis impediretur tensio (stress) oxydativa. Secundum relationem illius Societatis investigatores perscrutati sunt 25 fumatores validi, qui essent aetate media 26 annorum. Quorum ab unâ parte comesam esse socolatam amaram, ab alterâ albam. In alterâ parte effectûs salutares non potuisse observari. - LEO LATINUS:


INVENTOR USU FELIUM IN MATERIA COMBUSTIVA ACCUSATUS

Oecologi Theodisci reclamant incepto Christiani Koch, inventoris Saxoniensis 55 annorum, qui automobile ab ipso structum materia combustiva alit, quae materia e sordibus variis organicis permixtis comparatur, inter quas et feles mortuae in viis stratis repertae (pulsu autocinetorum scilicet necatae) inveniantur. Cui rei Koch negat.
Machina ab eodem inventore structa ad alimenta ignis fabricanda, nomine KDV 500 nuncupata, potest – dicit Koch – litram petrolei pretio 23 centesimarum euronis (salario artificium hac in calculatione respecto) producere, quod quinta tantum pars est pretii petrolei in stationibus petroleariis Germaniae in venum praebiti. Ut tamen 50 litras huius materiae combustivae fabricari possis, opus tibi erit – ita saltem oecologi - 20 felibus mixturae addendis. Cui rei tamen, at cuivis usui animalium mortuorum, societas mercatoria Koch, Alphakat GmbH, in pagina sua interretialis negat et in ius diurnarios "Bild" oecologosque mox vocare minatur.
Autocinetum Koch iam 170 milia chiliometrorum viarum emensum est. Nuntium de oecologis usui felium in petroleo eius reclamantibus in actis diurnis "Bild" legitur, quae acta novitates rumoresve varios incertae saepe fontis maxime quaerere cupiunt. NANOMPOUPHOS


INFANTEM SUPRA NUBES NATUM ESSE

Mosquâ ex urbe – Mulier gravidissima ex urbe Mosquâ in Civitates Unitas volans subito coepit parturire. Aeroplaniga autem non potuit statim terram appellere. Itaque infans natus est in aeroplano.Necesse fuit aeroplanum pergeret volare, quia Canadenses aeriportûs militares prope siti breviores erant, quam ut ad eosdem appelleretur aeroplanum generis Boeing 767. Mulier autem heri infantem suum supra Oceanum Pacificum peperisse ab Aeroflotianâ Societate Aeronauticâ relata est. Lactantem bene valere. Mulierem parientem adiutam esse ab hospitis. Aeroplanum Angelopolin cum appulsum esset, mater infantem amplexa sine adiutricibus abiisse ab Itar-Tass agenturâ nuntiorum Russicâ nuntiata est. Ex quinque annis primum in aeroplano Aeroflotiano supra nubes volante partum esse infantem. - LEO LATINUS



Maxime omnium gentium suicidio proni sunt Lithuani – patet ex investigatione a societate mundana sanitati propagandae World He BREVES:

Hosni Mubarak, praesidens Aegypti abhinc iam 24 annis, denuo in munus „capitis civitatis" diutius tenendum proportione 88% suffragiorum ab ipso victorum electus est. Quod hoc immo facto maioris momenti Mubarak sit, hac vice, primum in historia terrae, eum recte a populo in liberis comitiis electum esse. Quarta tamen tantum pars civium Aegyptensium licentia suffragandi fruentium suffragia sua dederunt, relictis domi remanentibus. - ST.

Fur marsupiorum octoginta annos natus aprehensus est a custodibus publicis in urbe Osaka Iaponensium. Hiroshi Abe repertus est, cum marsupium e sinu vestis alicuius viri clam extrahere conaretur. In marsupio sex milia nummorum ien erant, quod idem pretium est ut 50 dollarii Americanorum. - ST.

Aemulatione cohortis praetoriae Helvetorum cum aliis custodibus Vaticaniensibus (qui vero biocolytae Italiani sunt) fit ut papa Benedictus XVI satis tutum in civitate Vaticana se sentire non potest – dixit actis hebdomadalibus "Panorama" pristinus dux biocolytarum Vaticanensium Henricus Marinelli. Aemulatio amborum, quae iam diu in urbe sancta flagrabat, immo peior reddita sit electione novi pontificis, qui Helvetis aperte faveat. - ST.

Sexaginta annos postquam scripta missaque erat, advenit ad destinatarium epistula militis quidam Americani, qui anno 1944 in Europa contra Theodiscos pugnabat ibique anno 1945 ineunte in proelio cecidit – nuntiat "Washington Times". Epistulam inter actos quosdam diurnos veteres tempore fori nundinarum invenit aliquis collector rerum veterum Americanus, qui postea per annuntiationem in ephemeridibus publicatam familiam militis quaerebat, invenit et tandem sorori militis litteras ab eo scriptas tradere potuit. Incertum est, quam ob rem epistula, cui anno 1945 cursu militari Oceanum Atlanticum transgredi contigit, tunc iam in America amissa sit. - ST.

Abundantia telephonorum gestabilium fit ut vix in usu plus sint cellae telephonicae, haec signa diceres immortalia viarum urbium oppidorumque Europae Americaeque praeteriti saeculi. Ultima duo milia talium cellarum proximo anno tollendae sunt ex viis urbium Finniae, qua in natione 5,2 milionis civium iam quinque miliones telephonorum portabilium hominibus adsint. - ST.

Pretium tonsurae in Suetia idem esse debebit viris et mulieribus, aliter ut discriminatio sexus femininae punietur – decrevit, secundum actos Göteborgs-Posten, regimen terrae. Eodem decreto prohibitus sit mos taxiraedarum nocte pretio dimidiato mulieres vehi, ne per vias ambulantes a sceleribus adoriri possint – id enim discriminatio virorum censeatur. Factio autem parlamentaria feminarum, cui nomen Inceptum Feministicum, matrimonias tollendas esse volunt, nam – dicunt illae – nuptiis nihil amoris inesse, legem tantum possidendi (uxoris scilicet a marito) confirmandam eas institutas esse. Secundum indagationem opinionum factio haec quintam partem suffragiorum sibi asciscere possit. - ST.

Octo delphini hortus oceanarii oppidi Gulfport civitatis Missisipi fluctu eluviei turbine Katrina incitatae arrepti, reperti sunt in bracchio Sinus Mexicanae, quod bracchium civitates Luisianam et Alabamam dividit. Maxime fessa animalia, nam in horto oceanario iam nata venari numquam didicerint, a hominibus in cymbis advenientibus nutriuntur. Incertum etiam adhuc est modus optimus delphinos hos in oceanarium Gulfportiense (aut in aliud, nam hoc turbine valde vastatum putatur) e mari vehi possint. - ST.

Canis quidam vagus, qui mense Augusto a monachis monasterii buddhistici Boldsang Coreanorum receptus est, una cum monachis orare dicitur, eodem modo ut hi caput inter preces inclinans. Monachi fidelesque vicini hunc canem hominem aliquem magni momenti praeterita in incarnatione fuisse credunt. - ST.

Forceps ad carnem escae marinae extrahendam aptus necnon cochlear ad saccharum teae coffeaeve addendum, quod cochlear post usum ipsum comedere possis – nonnuli sunt utensiliorum, quae hoc anno in foro internationali inventorum "Galactica" montrantur. Forum hoc quotannis mense Septembri prope ad Barcinonem, in oppidulis Vilanova et la Getru habetur – destinatio eius est haec omnia visitatoribus praebere, quibus vita facilior reddi possit. - ST.


Retro ad:

Novissima editio
Summum paginae