LINGUA LATINA IN BRITANNIAM REDIBIT

Laetus nuntius apparuit recenter in actis diurnis Britannicis q.t.e. “Telegraphus cotidianus”. Summus studiorum moderator Gavinus Williamson “Consilium excellentiae Latinae” nuntiavit ut studium linguae Latinae magis effunderetur in publicis scholis. Iniustum esse paucos institutione privata utentes Latine discere. Lingua latina utilitatem multis iuvenibus afferre posse, praesertim in discendis alienis sermonibus utque in melius mutaretur linguae Anglicae et mathematicae cognitio, discrimine remoto inter scholas privatas et publicas. Nam tantum duas partes vel paulo magis lycaeorum ex centum institutionem Latinam offerunt, adversus quadraginta novem privatorum.

Ad hoc propositum sustinendum per quattuor annos quattuor milliones librarum sterlingicarum erogati sunt quadraginta scholis ducibus sumptis. Magistri parandi sunt ut Latinam linguam discipulos ab undecim annis ad sedecim doceant.

Omnes fautores antiquorum Romanorum sermonis exoptant ut idem eveniat in aliis nationibus et illud studium reparetur. Sunt qui quaerantur: “cui usui est hominibus nostrae aetatis?” “Ut minus rudes ignarique simus de linguis quibus utimur. Praeterea sermo cogitationem mentemque fingit. Nonne satis est? Tum historiam, philosophiam, ius, architecturam, urbium formam, vias de cultu civili Romanorum ne neglegatis!”

Scripsit Lydia Ariminensis