In provincia Canadensi Columbia Britannica ante aliquot dies CLXXXII sepulcra sine nomine puerorum aetate a septem ad quindecim annos apud tertiam scholam catholicam reperta sunt, ubi domicilium habebant nativi quibus nomen est Inuit. Hebdomadis praeteritis complura centena detecta erant, primum CCXV apud alterum paedagogium Columbiae Britannicae, deinde in provincia Saskatchewanensi DCCLI magna parte aetatis puerilis. Post sepulcreta inventa octo ecclesiae incensae sunt in nativorum territoriis.

Usque ad decimum decennium vicesimi saeculi, ut videtur, in summa quindecies centena milia puerorum gentis nativae ut lege Christiana educarentur e suis familiis ablati erant ac ducti ad vivendum in CXXXIX paedagogia, sed quattuor milia perierunt ob morbos vel derelicti. Quod constat ex investigatione effecta, sed etiam peiora: conversio ad Christianesimum coacta, prohibitio eorum lingua utendi, vis sexualis, mores condemnandi alius mentis.

Grex episcoporum catholicorum et delegatio nativorum Canadensium a Pontifice Francisco postero mensi Decembri recipientur: tamen tristis hereditas temporis praeteriti praesenti impendet, cum iam violentia in minores partes allophylas admissa oblitterari non potest.

Scripsit Lydia Ariminensis