Faulkner ante centum annos natus

Die uicesimo quinto mensis Septembris a. 1897 natus est Gulielmus Faulkner, scriptor Americanus summi ingenii. hic uir, ob opera fabulosa luculentissime composita, a. 1949 Praemio Nobel ornatus est. quibus in operibus narrat plerumque de hominibus qui regionem quandam Mississippianam c.n. Yoknapatawpha (Anglice Yoknapatawpha County) incolunt. huius regionis, quamquam ex suo ipsius ingenio est ficta, historiam incolas naturam loci tam lucide diligenterque exponit ut mundum quasi uiuidiorem nostro cotidiano ante oculos lectoris inducere uideatur. multa quoque argumenta in libris suis tractat: memoriam acerbam belli ciuilis illius atrocissimi, quam Americani meridiani conditam in imo corde usque ad haec tempora tenent; iniurias ciuium nigrorum, qui homines ordinis inferioris turpiter habentur; miserias adulescentium meridianorum optima prosapia ortorum, qui magnopere metuunt ne mores resque gestas proauorum suorum illustrium imitari non ualeant; denique omnia, quae ad cor humanum attinent. nonnulla uero opera Faulkneriana, praesertim Strepitus et furor (The Sound and the Fury), Cum iacebam moriens (As I Lay Dying), Lux mense Sextili (Light in August), Absalom, Absalom!, Viculus (The Hamlet) inter opera omnium aeuorum praeclarissima iuste numerantur. enimuero est res summo stupore digna, hunc uirum plerumque indoctum, qui maiorem partem uitae suae in oppidulo quodam Mississippiano egerit, opera tam splendida singularia reuelantia (ut ita dicam) secreta animi humani scripsisse. quae cum ita sint, exoptemus Felicissimum Natalem Gulielmo Faulkner, qui tot tamque pulchra dona generi humano in aeternum reliquerit!

Scripsit Henricus Bagthorpe