Annus
2 0 1 0


Incolae divitissimarum phylarchatum Sinus Persici multo saepius aliis laborant diabete hypotensione,

PHYLARCHATES ARABICAE LABORANT DIABETE OBESITATEQUE

Divitiae valetudini periculosae

Incolae divitissimarum phylarchatum Sinus Persici multo saepius aliis laborant diabete, hypertensione, obesitate atque aliis morbis. Causam talis condicionis valetudinis esse infirmitatem geneticam propter incestum ac endogamiam, quae ambo phaenomena communiter inter Arabes eveniunt - nuntiat Marta Urzędowska, relatrix ephemeridis Polonae "Gazeta Wyborcza", nitens datis publicatis a Dubaiensi Centro Genomati Arabico Investigando (CAGS).

- Dimidia pars meae familiae laborant diabete, omnes sunt pingues, nemo ullam disciplinam athleticam colilt - fatetur 25 annos natus incola Catariae, Abdullah An-Naimi. - Cui rei minime miror, nam plenitudo corporis adhuc apud nos putatur esse signum copiae rei familiaris at cibum accipere recusans periculum ineas hospitem maxime fore stomachaturum.

Ipse Abdullah, sicut fere dimidia pars virorum Catarensium, uxorem duxit consanguineam ipsius. - Tales sunt mores maiorum - explanat. At in Arabia Saudica res immo peius se habent, nam hic duas tertias partes matrimoniorum in circulo consanguineorum fiunt. Prohibitioni autem tale in coniugium eundi maxime reclamarent gentes potentissimae locales.

Secundum investigationes CAGS, in Arabia Saudica syndromate Downiano laborant in summa intermedia octoginta (80) infantes pro unumquodque mille neonatorum, cum in Francogallia tantum undequadraginta (39). Vicina Cataria sextum inter terras mundi locum tenet in indice civitatum cum maximo numero obesitate laborantium ac quintum in indice terrarum maxime diabete afflictarum. Post quinque proximos annos nimis pingues erunt, secundum data medicorurm Catarensium, 73% virum et 69% mulierum Catariae.

Praeter causas geneticas maxime nocet valetudini incolarum phylarchatum modus vitam gerendi. Divites enim Catarenses, Dubaienses aut Saudiani numquam fere pedibus ambulant, ubique autoraedis utentes. Ad corpus exercendum ambulationesve faciendas minime invitat quoque ipsa huius regionis temperies calidissima atque ars coquinaria Arabum, ubi regnat oryza cum arietina largiter adipe sparsa (maxime calorica sint quoque dulcedines Arabicae).

Scripsit Stanislaus iconoclastes.blog.onet.pl



Retro ad:

Novissima editio
Summum paginae