REGIMEN ATHENIENSE PRAEDICAT CRISIN TOTIUS ZONAE EURO

Post Graeciam Lusitania?

Difficultates Graeciae aes alienum solvendi diffundi possunt in totam zonam euro. Proxima victima verisimiliter erit Lusitania (Portugalia) - putat vicarius ministri primarii Graeciae, Theodoros Pangalos (photographemate monstratus).

- Vos esse poteritis victima novissima - dixit Pangalos percontatus ab ephemeride Lusitana "Jornal de Negocios". Addidit tamen se sperare ita fieri non necesse debere. - Spero nos inventuros solutionem crisis, quae oritur propter crescentia expensa aes alienum administrandi. Si tamen talem solutionem non inveniemus, crisis primo impetu percutiet Lusitaniam - dixit.

Rogatus, utrum crisis possit toti zonae euro nocere, respondit Pangalos: - Ita, sine dubio. Nos Graeci affecti crisi primi sumus, nam condicio nostra peior erat quam aliarum civitatum, sed simili modo crisis aggredi potest Hispaniam aut Lusitaniam.

Parvum incrementum oeconomicum atque lacuna rationis acceptorum et expensorum magnitudine 9,4 centesimarum productus domestici grossi (GDP) efficiunt, ut Lusitania re vera putabatur ab aliis terris eurozonae ut oeconomia vulnerabilis, licet expensa Graeciae ac ipsum aes alienum Lusitanorum aequent "tantum" 86 centesimis productus domestici grossi, dum in casu Graeciae 120% GDP (quod aequat 300 miliardis USD). Oeconomiae periti occidentales sperant programma parsimoniale Lusitaniae effecturum, ut usque annum 2013 huius terrae lacuna rationis acceptorum et expensorum comminuatur ad 2,8% GDP.

Ceterum Pangalos notus est sermonibus praeteritis duobus mensibus habitis, quibus magnas oeconomias Europaeas (imprimis Germaniam) solitus est accusare egoismi atque odii phyletici erga Graecos. Germania enim in principe obstat consiliis Graeciae auxilia monetaria ab aliis civitatibus esse ferenda, aut, si aliter fieri non possit, auxilia haec praebenda tantum ut "ultima tabula in naufragio".

Scripsit Stanislaus iconoclastes.blog.onet.pl