Mons Vulcanius pulverem album emittit

In Costa Rica post quietem XL annorum Turrialba, mons Vulcanius, in vitam rediit. Montem altitudinis plus MMMCCC metrorum “nubes pulveris albi” evomuisse institutum seismologicum Costaricense nuntiavit. rerum Vulcaniarum periti eas nubes non, ut esse solet , cinere constare, sed materiae adhuc ignotae esse dixerunt. quinque vicos in valle Turrialbana sitos eo pulvere obductos esse acta diurna “La Nacion” in paginis suis interretialibus nuntiaverunt. Fieri posse, ut maior immineret eruptio.

Turrialba mons LX tantum chiliometra a Sancto Iosepho, capite Costae Ricae, distat.

Francogalli burcam vetant

Multa DCCL euronum damnabitur, quae in locis publicis velamine „burca“ appellato induta erit. Hanc legem partes Francogallicas UMP propediem laturas statio emissoria France Info nuntiavit. Eos, qui mulierem cogerent, ut burca indueretur, graviores poenas daturos esse praeses earum partium, Ioannes Franciscus Cope, dixit;se contendere, ut ea lex ad mensem Septembrem daretur.

Nicolaus Sarkozy, praeses rei publicae, iterum atque iterum dixerat id velamen signum esse servitutis atque humilitatis idque in Francogallia minime gratum esse, quamquam incertus erat, burca indui vetaretur necne. Sarkozy enim dixit parlamento licere per declarationem obligatoriam diiudicare se talem habitum abnuere.

Praeter ceteros ecclesia catholica illam legem vituperavit: quam Ioannes Lucas Brunin, episcopus Corcicus, „errorem magnum“ appellavit, quia noceret; Ioannes Paulus Jaeger, episcopus Atrebas, cum hanc legem reiceret, tamen probavit magistratibus ius esse cives cognoscendi. Nam cultus atque humanitatis Europaeae esse apertam se ostendere. Tamen sunt, qui regimini vitio vertant, quod cives perterreant, cum MM tantum mulieres in burcam se induant.

Num telephonis portabilibus morbus Alzheimer prohibetur?

Medici universitatis litterarum Floridae meridionalis investigaverunt radiis, qui telephonis portabilibus emittuntur, morbum Alzheimer a muribus prohiberi. Praeterea in muribus, qui eo morbo iam affecti essent, morbum eo modo leniri. Quin etiam memoriam ipsam – sanorum scilicet murium - ea radiatione auctam esse. Medici, quamquam causam eius rei nesciunt, tamen eventum ad homines quoque pertinere pro certo habent.

Investigatores centum fere muribus ad hoc experimentum faciendum usi sunt, quorum plurimi genetice erant mutati; in quorum cerebris sedimenta illius morbi propria cognosceres. Mures ipsi in caveis sedebant circum antemnam positis; quae antemna radiationem electromagneticam frequentiae CMXVIII MHz – ut e telephonis portabilibus emitti solet – per novem menses duabus singulis diebus horis emittebat.

In cerebris murium iuvenilium nec morbosorum nulla quidem illius „Beta-Amyloidis“ vestigia conspiciebantur integra eorum facultate cognoscendi. Veteres autem morbososque mures, cum radiationi plurium mensium expositi essent, eosdem habuisse eventus atque sanos mures medici cognoverunt. Praeterea memoriam murium sanorum, cum huic radiationi essent expositi, auctam esse iisdem experimentis probatum est.

Quamvis causa earum rerum adhuc esset incerta, medici tamen suspicantur sedimenta cerebralia eo facilius resolvi, quo magis cerebrum radiatione calesceret. Qua etiam cellulas cerebrales ita incitari , ut circulationi sanguinis faveretur.

Commissarii Unionis Europaeae actionem instituunt de salariis augendis

Commissarii Unionis Europaeae actionem instituerunt, quod salaria magistratuum Unionis parum aucta essent. Magistratus hoc modo salaria aucta reiciunt, quae mense Decembri anni superioris a civitatibus Unionis constituta erant. Quae salaria commissariis invitis duobus tantum fere centesimis aucta sunt. Pia Maria Ahrenkilde, quae pro commissariis locuta est, dixit ad unum omnes petivisse, ut, quod a Consilio Unionis in ea re esset constitutum, aboleretur, praetereaque, ut de ea re „ratione accelerata“ ageretur.

Quae autem res ad plus XL milia magistratuum Unionis pertinet, in quibus commissarii ipsi sunt eorumque praeses, Barroso, deinde iudices Unionis Europaeae, praeses Consilii, Hermannus Van Rompuy omnesque delegati, qui pecuniam suam ex aerario Unionis accipiunt.

Commissarii iam mense Decembri dixerunt se quidem certiores de ea re esse factos, quae tamen cum ea ratione, quae lege constituta esset, minime conveniret. Secundum quam rationem salaria magistratuum Unionis tanto aut augeri aut minui oportere, quanto in quibusdam civitatibus anno MMVIII mutata essent. Cum complures civitatum moderatores censerent magistratus non decere , si in tanto discrimine oeconomico tanto plus mererent, commissarii Europaei affirmabant rationem, secundum quam salaria augenda sive minuenda essent, ex pacto fieri ideoque esse servandam.

Scripsit Volfgangus Austriacus