Annus
2 0 1 0


Hodie Olisiponi (

SUMMITAS OLISIPONENSIS NATO

Exsistentia foederis a re Afgana pendet

Hodie Olisiponi (in urbe scilicet capitali Lusitanorum) incipit colloquium summitarium praesidentium duodetriginta (28) terrarum sociarum foederis NATO. Agetur de ipsa ratione NATO porro exsistere.

Summitatem Olisiponensem NATO multi commentarii putant fore maximi momenti identitati Foederis Atlantici, quod foedus anno 1949 conditum est ut expansio militaris ac politica cohiberetur Unionis Sovieticae. Cuius post cladem anni 1991 NATO hostem verum non habens 'crisi identitatis' laborabat, anno autem 2001, ictibus tromocratarum peractis in Turres Geminas (Neoeboracenses) et Pentagonium (Vasintoniense), instantibus USA se pugnae contra terroristas islamicos dedit. Nunc tamen, cum consilia quasi capta sint usque finem 2014 agmina NATOensia ab Afganistania reductum iri, politici terrarum sociarum saepius saepiusque rogant: Quid porro?

Timetur quoque, ne fiat NATO "foedus edentulum" (sicut hodie sit Organisatio Securitatis et Cooperationis in Europa [OSCE]), ubi res maximi militaris momenti perficiantur a copiis US-Americanorum cum suis sociis fidelibus, ut Britanni. Adcovatur a diurnariis in memoriam exemplum 'scuti antinuclearis', cuius sortem decretam esse in bilateralibus sermonibus inter Vasintoniam et Pragam Varsoviamque, aliis sociarum minime de hac re consultatis.

Ut signum novi temporis, cum Russia non porro hostis foederi imminens putetur, praesidens Russorum Demietrius Medvedev invitatus est, ut summitati Olisiponensi adesset.

Ipsa Afganistania sine dubio in media re colloquii manebit, nam periti rerum militarium timent etiam abeunte anno 2014 regimen Kabulense paratum non fore, ut tota hac terra potiatur. Nonnulli duces agminum foederis expressis verbis monent fieri posse, ut copiis NATOensibus domum reductis victorem belli civilis Afganensis discedat grex Talebanorum - quae res non solum colaphus in faciem foederis esset, sed quoque fortasse initium finis ipsius NATO exsistentiae.

Hodie Afganistaniae adsunt circiter 130.000 militum terrarum sociarum Foederis Atlantici. Primi eorum domum reducendi sint iam anno 2011.

 

Scripsit Stanislaus Varsoviensis



Retro ad:

Novissima editio
Summum paginae