Annus
2 0 1 0


De tsumami,

De tsunami, quo Indonesia affecta est

Postquam tsunamis mortiferus, cuius causa fuit ingens terrae motus subaquaneus in oceano Indico, aliquot insulas Indonesiae percussit, in insulis Mentawaibus centeni requiruntur: cum CCCXLIII victimae iam compertae sint, verentur adiutores ne quadingenti homines unda immani abrepti demersi sint. Una tantum navis oneraria, commeatus aquae et medicaminum plena, neglecta procella litora vastata attigit. Praeses Indonesiae regiones calamitatis victimas visitavit casas nosocomia scholas brevi tempore exstructum iri pollicens.

Ex helicopteris vici undis demersi vix agnoscuntur: corpora exanimata in litoribus iacere, miseros propinquos suos requirentes vagari. Auctoritates confirmaverunt systema monitorium ab anno bismillesimo quarto institutum munere suo non functum esse: Institutum Indonesiacum Technologicum nuntiavit duo instrumenta fluitantia mensuris addicta arte damnis talibus affecta esse, ut nullum signum transmittere possent. Iam anno praeterito mille circiter homines propter terrae motum subaquaneum interierunt.

Scripsit Herimannus Novocomensis



Retro ad:

Novissima editio
Summum paginae