FINIS FELIX CALAMITATIS FODINARIAE IN CHILIA

Omnes 33 ascendimus ad superficiem et valemus

Hora vicesima secunda (hora Chiliensi) omnes fodinarii qui dies 70 sub terra permanserant singuli sunt per tubulationem 622 metrorum, capsula "Phoenix" nuncupata, in superficiem ascensi; ibi exspectabant Praeses Reipublicae Sebastianus (Sebastián) Pinera, ministri statales, eorum uxores et cognati, alii fodinarii atque magna diurnariorum turma, qui ex plus quam 70 nationibus advenerunt patientes 30 gradus caloris diurni et vehemens frigus nocturnum; magnoque gaudio singulos egredientes amplexabantur omnes; non solum mulieres sed etiam viri permoti lacrimas effundebant; quidam iocularis ex liberatis munera Praesidi, uxori, sodalibusque attulit: lapides ex fovea, quae aureae esse dicebantur; ex 33 fodinariis unus est Bolivianus, Carolus (Carlos) Mamani, cui Praeses Evus (Evo) Morales ex Bolivia iter fecit congratulaturus.

De tanta re tantoque opere quaedam possunt specialiter referri.

-Chilia in quodam animo unitatis his diebus versata est, primum quod calamitas magna lugenda 70 dies abhinc evenit, dein quod fodinarii vivi se nuntiarunt, denique quod omnes cives una cum diurnariis et totius mundi televisoribus concordes et unanimi fodinarios redemptos et salvos magno gaudio receperunt;

-Technicorum auxiliariorumque manipulus multa coordinatione et diligentia usus est, ut sine ullo periculum et damno fodinarii rebus adversissimis liberati sint; Praeses Pinera magni fecit horum laborem eosque palam laudavit;

-Res fodinariis privatae gaudio commixtae in publicum eruperunt: vel nata, quam uxor cuiusdam fodinarii nuper peperit cui nomen Spes (Esperanza) indictum est; vel uxor alius quae noluit metalla adire virum exspectatura, quia fodinarius alteram quoque mulierem habebat, quae ibi etiam exspectatura erat; vel fodinarius qui post aliquot annos una cum femina convivebat, et ab inferis ex ea matrimonium petivit;

-Numquam est tam male Chiliensibus qui laetum animum amiserint; itaque ad nuntium quod de se ad superficiem post dies 17 fodinarii inclusi miserunt, aliqua verba ­ut quidam suspiciati sunt- erant addenda: omnes 32 sumus in refugio et valemus: Boliviano vescimur.

Scripsit Paulus Kangiser