PERICULUM ALTERIUS CRISIS OECONOMICAE

Fed vult mercatum porro sustenari

Praeses argentariae statalis US-Americanorum (Fed), Ben Bernanke (qui hic a laeva photographemate monstratur), annuntiavit se paratum esse mercatum nova pecunia publica argentariis privatis credita sustentaturum. Quae sit responsio Fed ad inopinate mala novissima data macrooeconomica, quibus divulgatis possibilior videatur alter ictus crisis oeconomicae, quae mordet oeconomiam mundanam ab anno 2008.

Bernanke annuntiavit se cogitare de novis 'mediis extraordinariis', quae media, secundum analystas oeconomiae et USAe et globalis, spectent imprimis ad 'mitigationem quantitativam' (Anglice quantitative easing), id est pecuniam publicam facilibus condicionibus praebendam argentariis privatis aere allieno nimis laborantibus. Annis 2008-2009 Fed, similiter ut aliae argentariae statales magnarum potestatum oeconomicarum mundi, 1,25 bilionis dolariorum talis pecuniae creditum dederunt; ut patet nunc, non satis.

At novissimis datis macrooeconomicis patet oeconomiam USA non tam cito e crisi annorum 2008-2009 se ultimis mensibus recuperare quam solebat. Ita altero trimestri huius anni productus domesticus generalis (GDP) crevit solis 1,6 centesimis, dum primis tribus mensibus 2010 anni creverat passu 3,7%. Secundum analystas, GDP debeat saltem passu trium centesimarum crescere, ut contineat incrementum numeri hominum sine labore manentium, quorum adesse Civitatibus Unitis 9,5%.

Praesidem Fed conturbant quoque data spectantia ad pessimam condicionem mercatus novarum domorum, quarum emptiones rarissimae hodie in USA fiunt ab anno 1963, cum haec statistica coepit observitari.

Internationaliter tamen boni nuntii sunt incrementa citissima productus domestici Serum Indorumque, necnon maius opinato incrementum GDP apud Germanos. Nihilominus yen nummum Iaponicum esse validissimum contra dolarium USA spatio praeteritorum quindecim annorum; at appretiatio yen saepissime fit, cum oeconomia et Iaponiae et simul globalis non tam bene se habeat, nam haec moneta terrae-exportatrici (sc. Iaponiae) magis proditura sit cum parvi (erga alios nummos) aestimetur. Apretiationi novissimae yen comitantur casus pretii titulorum maximarum negotiationum Iaponensium.

Scripsit iconoclastes.blog.onet.pl