Annus
2 0 1 0


SODALITAS HRW DE STATU IURUM HUMANORUM SOLLICITA EST

HUMAN RIGHTS WATCH DE STATU IURUM HUMANORUM:

Libertas hominum violatur!

Sodalitas Americana iuribus humanis observandis (Human Rights Watch, HRW) questa est, quod anno MMIX numerus eorum, qui iurum humanorum defensores aggressi essent, iterum crevisset.

Index hodie editus, in quo civitates continentur, in quibus iura humana negleguntur, longissimus est: praeter Afghanistaniam, Iraniam, Cubam,Simbabwen, Russiam, Siniam, Sudaniam etiam Civitates Unitae Americae in eo indice inveniuntur: quamquam officium secretum CIA nullas iam quaestiones haberet, campum Guantanamensem tamen nondum esse clausum Kenneth Roth scripsit, qui ei sodalitati praeest. Praesidem Obamam primo quidem praesidiatus anno contendisse, ut fides Civitatum Unitarum, quatenus ad iura humana spectaret, restitueretur; sed nunc ei videndum esse, ut e verbis facta fierent.

Sed defensores iurum humanorum non solum in iis civitatibus petuntur , quae potestate paucorum reguntur: in Russia e.g. statum iurum humanorum, quamquam Demetrius Medwedew pollicitus esset sibi hanc rem curae fore, deteriorem factum esse in annalibus societatis supra dictae nuntiatum est.

Quinque minimum defensores iurum civilium esse occisos, plures timefactos; praecipue in Tsetsenia iura humana gravissime neglecta esse.

In Irania homines hoc decennio eximia insolentia opprimi HRW affirmavit. Regimen post electionem dubiam , quae die XII.Iunii habita esset, vehementer adversarios petiisse; vigilibus publicis militibusque caedem minimum XXX civium crimini dari, praeterea plus IV milia hominum comprehensos esse; multos, qui praesidi Ahmadinedshad iterum electo reclamavissent, in vincula esse coniectos, quamvis accusati non essent. Ceterum in nulla terra tot homines supplicio capitis esse affectos Sinia scilicet excepta.

Scripsit Volfgangus Austriacus



Retro ad:

Novissima editio
Summum paginae