Cur Michael Weisskopf, diurnarius Americanus, praemio insigni honestatus sit.

Hesterno die quadam in exedra palatii Urbinatis, quod splendidioribus monumentis saeculo XV in Italia aedificatis adnumeratur quodque Friderico Montisferetrano (1422-1482), praeclaro invictoque aetatis illius duci, haud parum gloriae adtulit, Michael Weisskopf praemio insigni honestatus est. Hic diurnarius Americanus munera sua, veritatem scilicet referendi nullis inquinatam opinionibus praeiudicatis, non modo explere semper contendit, verum etiam capitis periculum adire haud timuit. Nam anno 2003, dum est in Iraquia et autocineto 'Jeep' vocitato unâ cum nonnullis militibus vehitur, pyrobolum in ipsos iactatum reicere valuit itaque eos a morte certa servavit, sed brachium dexterum Michaeli detruncatum est. Italicam linguam
intellegentibus suaserim ut paginam legant hanc:

<http://tinyurl.com/yspyzj>

Scripsit Victorius Ciarrocchi