E Sicilia semper aliquid novi... nam Africa iamdudum non valde iocosa nuntia affert

Haud parva sollicitatione laborabant hornotini anni vere aranciorum cultores Siciliae, nam vix ullos operariios inter suos cives, qui voluerint fructus carpere, invenire potuerunt. Ut nuntiant tamen acta "La Reppubblica", difficultati solutionem invenit Siculus Salvatore Cultrona, qui a longo iam tempore in civitate foederali Bavaria Germanorum vitam degit. Nempe Salvator (nomen omen) ille ephemeridibus nonnullis Bavaricis praeconia adiunxit rusticationem iucundam Germanis praebens, cum recreatione corporis in hortulis Siculis laborando. Pro qua opportunitate solvendum est "corpora recreantibus" 750 eurones per septimanam. Hoc modo habent Siculi operarios, qui non tantum arancia, id est poma Sinensia, gratis carpant, sed etima pecuniam pro permissione ibi laborandi haud parvam relinquant.

15 incolae vici Lidodia Eubea proper Cataniam Siculanorum maxima calamitate se passos esse decreverunt, noctu inter 14 et 15 dies mensis Septembris anni 2002 vico eorum ingenti turbine aeria afflicto nonnullisque aedificiis ibidem deletis. Pro quibus damnis restituendis 370 milia euronum mox post calamitatem a societate securitatum publica acceperunt. Nuper tamen officiales praevisiones prognosticas tempestatis illius temporis accuratius investigaverunt inveneruntque nullam turbinem re vera tunc ibi evenisse, rem omnem ad pecuniam obtinendam tantum ab incolis inventam esse. Qua occassione deleverunt agricolae nonnullas domos suas. Nunc - nuntiat agentura diurnaria Italiana Ansa - iis haec pecunia societati securitatum reddenda est necnon in ius vocatio minatur.

Polonos quoque non sine causa Italica vero phantasia praeditos esso nonnulli nuncupant. Cuius honoris digni certe se praestiterunt tres iuvenes fures... laophori sive autoraedae publicae, quae ad tempus breve ab epibatis gubernatoreque relicta manebat in area stativa prope ad pantopolium magnum in suburbio Varsoviae nomine Janki. Qui fures ad locum ferrei reiectanei vendendi itinere triginta chiliometrorum laophorum duxerunt ibidem pro pecunia 2600 aureorum (circiter 850 USD) solverunt, a nemine rogati, unde iis laophorum tale et cur id ut ferrum reiectaneum (nam raeda non satis vetus erat) vendere in mentem venerit. Re in lucem prodita apprehensus tamen est possessor loci venditorii. Necnon ipsi iuvenes imaginatione vero Byzantina praediti.

A Polonia non procul Ucraina adest, praesertim autem pars eius Ruthenia Rubra cum urbe eius quasi capitali Leopoli. Ibidem, aut potius prope ad urbem ipsam, ruri suburbano, instabili re politica Kioviensi minime turbatus, 116 annum vitae modo complevit Gregorius (Hryhori) Nestor (ne denuo 'nomen omen' dicam...), 15 Martio anni 1891 natus. Qui senex usque ad centesimum vitae annum ipse cottidie in agro laborabat, cotidieque poculum aquae vitae usque nunc haurit. Aliter maxime civibus amoenem civitatem omnium Imperium Austro-Hungaricum, quod bene meminit, putat, at secretum longitudinis admodum simplex omnibus praebet: Umquam - explanat - neminem mulierem uxorem duxi.

Scripsit