De Euripidis fabulis doctus est liber nuper editus

Iis omnibus, qui fabulas tragicas colunt theatrumque Graecum diligunt, ubicumque terrarum sunt, ad animum satiandum mentemque ditandam, Hedvigis Czerwinska, litterarum Graecarum docta profestrix nec non acris vestigatrix, luculentum ac doctrina atque eruditione mirum comparavit librum, qui Italice inscribitur ANTHROPEIA PHYSIS COME DRAMATIS PERSONA IN EURIPIDE.

Libro perlecto, Hedvigis, uti constat, omnium longe doctissima ac peritissima Euripidis fabularum evadit: una enim est, quae in universo terrarum orbe fabulas tragicas adhibeat easdemque magna cum peritia, novis argumentis additis et enodatis, eo exhibeat more atque amore, ut Euripides ipse loqui videatur.

Euripides enim eo fabulas consilio conscripsit, ut cives Athenienses illas doceret virtutes, quas haud pauci vel amisissent vel parvi ducerent. Ceterorum autem virorum doctorum, qui illa aut priore aetate floruerunt, praeceptis allatis et explanatis, summus Atheniensis poëta ea omnia in scaenam duxit argumenta, quae vel in viis vel in foris vel in scholis inter bellum Peloponnesium agitabantur.

Cum autem pauca adhuc libri exstent exemplaria, uti domus editoria nos certiores fecit, humanissimos viros hortamur, ut per hunc cursum electronicum www.press.uni.lodz.pl/order.html librum, si aliquod exemplar habere cupiant et inveniant, quam primum emant. Quo lecto animoque ditato, praeclarum Edvigis opus in bibliotheca docti seponant, ut tempore dato mentem doctrinae deliciis iterum ornent.

(Scriptum hoc ab amico lingua Latina peritissimo Herimanno Novocomensi traditum est)

Scripsit Herimannus Novocomensis