VICTORIAM MEDIOLANENSIUM SUPER FENERBAHCE TOLLERE VOLUNT IURIS PERITI TURCI

Crux rubra offendit musulmanos?

In ius a Turcis vocata est manus pedilusoria Inter Milan, nam tempore certaminis contra Constantinopolitanam Fenerbahce lusores Mediolani usi erant camisis cruce rubra signatis. Quae crux insigne est urbis Mediolani, sed Turcis in memoriam imprimis vocet milites crucigeros saeculis XI-XIII "terram sacram" vi recupiscentes necnon caedes permultas civium in Proximo Oriente perpetrantes. Camisiae illae - asseverat Baris Kaska e grapheo iuridico Smyrniano Turkoglu & Turkoglu - "offendunt sensus musulmanorum".

Lis orta est e certamine "Ligationis Campionum" 27 Novembri habito inter ambas manus in stadio Mediolanensi San Siro, quo Itali Turcos effectu 3:0 superaverunt. Nunc iuris periti Turci volunt, praeter multam pecuniariam Mediolanis adiudicandam, etiam societates internationales pedilusorias UEFA et FIFA decreturas victoriam "per concessionem" (Anglice walkover) Constantinopolitanis attribui.

"Haec crux symbolus est phyletismi occidentalium, qui superiores se sentiunt gentibus islamicis" - dixit Kaska diurnariis ephemeridis Hispanae La Vanguardia. Eius sententia has camisias induentes losores Mediolani aperte manifestare voluerunt superioritatem unius fidei super aliam. "Quomodo UEFA potest tolerare talia?" - rogant acta diurna Turcica Radikal.

Qae camisiae re vera nuper demum a Mediolanis in usu sunt, occasione appropinquanti centenarii anniversarii consociationis athleticae Inter Milan condendi anno 1908. Tempore primi certaminis contra Fenerbahce Constantinopoli habito, quo Turci victores discesserunt effectu 1:0, Mediolani consulto aliis camisiis usi sunt, deinde tamen, in sui loco, Itali senserunt iis licere crucis rubris se signare.

Rerum pedilusorium periti putant vix fieri posse, ut effectus certaminis tollatur, nam novissimae camisiae Mediolanensium ante primum earum usum probatae sunt ab UEFA. Alii adiciunt crucem rubram vexillo Angliae adesse - sit ergo id vexillum, sicut et insigne urbis Mediolani, mutandum? Etiam alii sarcastice rogant, utrum in ius vocati crucesignati Itali essent, si victoriam in San Siro Turci reportavissent?

Scripsit Stanislaus Tekieli