Montgomery ex urbe – Iohannides (Jamison) Stone puer Alabamanus: "Verisimile non est" inquit „iterum factum iri, ut sclopetando interficiam bestiam tantam". Haud scimus, an Iohannides hoc praedixerit verum. Îdem discipulus undecim annos natus Pickensvillâ e vico Alabamae Civitatis Americae foederalis oriundus dicit se venatum necasse istum suem ferum, ad quem ritê denominandum hôc tempore relatores confingunt nova verba superlativa, qualia sunt: „mega-verres", „sus monstruosus", „aper Goliathêus".

Photographemate huius bestiae gigantêae factum est, ut multi lectores ipsius SPIEGEL-ONLINE stupêrent increduli. Sed homines talium bestiarum periti putant fieri posse, ut tantus sus versetur in locis feris – etiamsi vix sit verres conseminii merê feri.

Michael Wendt, professor Universitatis Veterinariae Hanoveranae redactoribus ipsius SPIEGEL ONLINE: "Haec bestia" inquit „procul dubio ingens est". Eandem fortasse esse mixturam suis domesticae et ferae. Tali in casu explicari etiam posse pondus enorme. „Sues domestici mares assequi possunt pondus quadringentorum chiliogrammorum. Interdum inveniuntur porci tanti ponderis quanti est ea bestia in Americâ inventa".

At constat nunc istum gigantem esse mortuum. Puer eiusque pater narrant se d.3. m. Maii iter fecisse per silvarum Alabamensium regionem, quae appelletur „plantatio rivi amissi"; in eâdem solent fieri venationes commerciales. Iohannides, quamvis sit aetate tenerrimâ, sclopetandi est bene peritus, praesertim cum iam pupillus quinquennis primum suum prostraverit cervum.

Iohannides affirmat se *revolucro suo Smithio-Wessoniano, quod sit +calibri quinquagenarii, octies sclopetasse in istum alpha-aprum, deinde se ipsum et patrem suum duosque duces istum suem ferum per dumetum persecutos esse. Sese hoc fecisse per tres horas, usque dum verrem vulneratum invenirent in alveo fluvii, qui exaruisset. Ictu frontali horridam beluam finaliter confectam esse.

Michael autem pater Iohannidae affirmat se ipsum ducesque sclopeta sua genîs apposuisse – sic futurum fuisse, ut se defenderent, si monstrum in se invectum esset. Iohannides postea: "Hoc" inquit „bene contigit. Paululum timui, necnon animus meus aliquantulum erat excitatus". Animo elato idem puer stabat photographandus iuxta praedam suam opîmam.

In Americâ de venatione verris huius *mammutoidei alii aliter sentiunt: Cum venatores in foris suis interretialibus eximiê laudant facinus „Americani iuvenis luculenti", tutores bestiarum vehementer dolet, quod ipsi verri non praesto fuerit telum, quo se defenderet sat efficaciter.

Ut aper mortuus ex silvâ transportaretur, nonnullae arbores fuerunt caedendae. In lîbrâ autem rusticorum pecuariâ Linevillensi pondus monstri mensuratum est: Verres vastissimus pondere fuit 477 (quadringentorum septuaginta septem) chiliogrammorum, longitudine 2,80 (duorum – virgula – octoginta) metrorum, cervîcis ambitu fuit 1,88 m (unius metri – duodenonaginta centimetrorum). Itaque hic verres dignus est, qui inscribatur libro illi Guinnessiano: Alius enim aper a.2004 in Georgiâ Civitate foederali interfectus, cui post mortem nomen impositum est „Hogzilla", pondere fuit 400 (quadringentorum) „tantum" chiliogrammorum.

Praeterea nihil nisi aprugna tomacula, farcimina, botuli. Michael Stone pater: "Verisimile est" inquit „nos accepturos esse quingentas vel septingentas lîbras farciminum." Iohannides autem Stone perget venari. At loco aprorum îdem venari vult aves perdîcês: "Quae sunt minus periculosae."