Annus
2 0 0 7


Hungari inceptum Russicum gasiductus Transeuropaei eligerunt -

Hungari inceptum Russicum gasiductus Transeuropaei elegerunt - eorum sententia melius id sit simili incepto Unionis Europaeae.

De gasiductu "Torrens Caeruleus" agitur, qui sit extensio iam exsistentis "Torrentis Caerulei", quo per fundum Maris Nigri (Ponti Euxini) hauritur a Turcis methanium (sive gasium naturale) Russicum, a Sibiria Occidentali fistulis metallicis in litus Euxinum ductum. E Turcia extendet oleiductus usque ad fines Hungarorum, in via Bulgariam et Dacoromaniam percurrens. Et hic difficultas, nam eadem via struendus erat et officialiter adhuc est oleiductus "Nabucco", cui Commissio Europaea maxime favet, nam eius usu methanium a Mari Hyrcano (Caspico), ergo a fonte altero quam Russia (Azeristania scilicet, aut Kazachstania, aut Turkmenia), in Europam Meridionalem suppeditari possit.

Regimen socialistarum Hungariae, terrae-membri Unionis Europaeae, eligit tamen inceptum Russicum, quod, si vero incorporetur, cladem incepti "Nabucco" efficere poterit, nam duo oleiductus eadem via currentes vix fieri possint, praecipue quod gasium Russicum semper paululum viliorem fore creditur (gasium Hyrcanum primum per Mare Hyrcano - si a Turkmenia Kazachstaniave ductum - deinde per Montem Caucasum trahi debeat). Rebus ita stantibus futurum incepti "Nabucco" nunc valde incertum Bruxellensibus videtur. Quod re vera a sui natu sors eius erat, nam per nimis multas variasque terras esset ei percurrendum et numquam tot regimina ad idem consilium advenire sciebant. Quod et causa erat optionis Hungarorum. Ut dixit minister eorum primarius Ferenc (Franciscus) Gyurcsany, "Torrens Caeruleus" una tantum re superat "Nabucco": in duobus annis fieri poterit, dum "Nabucco"... nemo scit quando.

Scripsit Stanislaus Varsoviensis



Retro ad:

Novissima editio
Summum paginae