Homo interfector mammalium Australiae?

Non caelum celerrime mutatum sed hominem fuisse necatorem mammalium magnorum Australiae ante circiter 45 milia annorum monstrant inventa palaeologica reccentia - nuntiant acta scientifica "Nature".

De ossibus agitur anno 2002 repertis a studiosis professoris Gavin Pideux (e Museo Australiae Occidentalis, Perthiae) in planitie Nullarbor Australiae Meridionalis (locus exactus inventionis adhuc, ob timorem latronum, publice non divulgatur). Quae ossa continent inter alia etiam fere intacta duodecim sceleta thylacoleonis carnificis, id est maximae proceritatis leonis marsupialis (i.e. marsupio praediti, ut mos est etiam multis hodiernis mammalibus Australiae). Quibus accedunt sceleta octo adhuc ignotorum generum halmaturi (Anglice: kangaroo), inter quae genera est quoque halmaturus altitudinis trium metrorum, deinde ossa dromornis Stirtoni, quae avis sit maxima omnium in toto orbe terrarum olim hodieve viventium (pondere ca. 500 chiliogrammatum), deinc diprotodonis optati, qui herbiphagus similis rhinocero hodierno nostro fuisse putatur.

Haec omnia sceleta ossaque inventa sunt in praeruptis cuiusdam speluncae - omnia supradicta animalia creduntur casu illuc cecidisse statimque postea ob ictum in fundum saxeum speluncae mortua esse. Spelunca aperta erat per circa decem milia annorum aliquando inter 800 000 et 400 000 ante annos, postea os eius lapidibus obtecta est, quod factum sceleta ab aere umoreque intacta servavit.

Ubi tamen argumentum mammalia magna (Anglice: megafauna) Australiae ab homine, non a caeli perturbatione esse exscissa? Accurata investigatio ossum monstrat haec genera mammalium tempora siccitatis maximae supervivisse, quae tempora multo graviora eis essent quam perturbatio caeli inter 50 et 40 milia ante annos habita, quae mutatio temperiei effectum erat motuum molis glaciatae septentrionalis. Si ergo non siccitas recens necator mammalium erat, homo eum fuisse debet, qui eodem tempore ad insulam Australiam primum pervenit.

Repertum professoris Prideaux nonnulli collegae eius lapidem Rosettaneum disciplinae palaeontologicae nominant, in memoriam revocentes lapidem, ubi isdem textus Graece et Aegyptice inscriptus clavem Aegyptologis dedit ad hieroglyphos intellegendos.

Scripsit Nanompouphos