De cruore in Guatemala effuso

Guatemalae, in capite nationis nomine eodem appellatae, postquam grex latronum in gemmarii taberna defensore interfecto praedatus erat, astynomi et milites catervatim aedes circumdederunt ubi scelesti confugerant se minime tradituri, posthac diu dimicatum est. E publicis custodibus unus percussus mortem obiit, quinque vulneribus affecti sunt, sed repugnantibus devictis sex latronum corpora exanimata elata sunt necnon aliquot pyrobola granata aliaque arma ignea.

Guatemala inter pauperrimas et iniquissimas Americae mediae civitates numeratur: cuius nationis pecuniae reditus cotidianus pro capite circiter est septem dollaris (minus decem euronibus), miserrimam vitam agricolae et indigenae degunt: magna pars infantium aegrotant esurientes, litterarum ludi desunt, spes vitae LXIII annos viris, LXXI feminis attingit, quod Guatemalam in infelicissimarum Americae nationum numero collocat. Ideo et latronum turmae et illicitorum pharmacorum mercatores, qui Americae septemptrionalis addictos iuvenes suppeditant, iamdiu abundant.

Scripsit Herimannus Novocomensis