De reclamationibus in Peruvia

Peruvia tota operstitio septimana praeterita constitit: multitudines Limae necnon in ceteris amplissimis urbibus per fora viasque reclamaverunt, quorum tres ab astyphylacibus interfecti sunt. Multo graviores tumultus hi fuerunt, quam omnes qui recentibus annis totam rem publicam perturbaverant. Reclamationes contra regimen praesidentis Alani Garciae, qui fere ab anno munere suo fungitur, magistrorum operstitio coeperat, deinde operarii aedificatores, agricolae, fossores consecuti sunt.

Limae, in capite Peruviae, proelia per vias facta sunt quibus centum circiter ductores societatum operariorum defendentium comprehensi in vincula coniecti sunt; Arequipae, in Peruviae secunda urbe, magistri lycopersica et ova in praesidentem coniecerunt et reclamantes irati astynomos brevi tempore eripuerunt.

Magistrorum tumultus tum ortus est, cum a regimine deliberatum est omnes examine probare ac dimittere illos, cuius exitus exspectationibus non respondeant: qua ratione verentur ductores magistrorum societatum ut catervatim munere amoveantur. Dux vero oppositorum Ollanta Humala se reclamantibus coniungit, praesidentem accusans quod, quamquam augeantur divitiae Peruviae, nullo modo populi condiciones melòiores factae sint.

Scripsit Herimannus Novocomensis