SPIEGEL ONLINE - 01
ATTENTATIONES MULTIPLICES
Britannos flagitari, ut adiuvent tromocratarum investigatores
In Magnâ Britanniâ quam attentissimê investigantur praedispositores attentationum Glascuae et Londinii frustrâ factarum. Quinque suspiciosi sunt arrestati, compluribus locis domûs sunt perquisitae. Gordonus Brown Britanniae minister primarius Britannos flagitavit, ut essent summâ vigilantiâ.
Londinio ex urbe - Gordonus Brown hodie e statione BBC radiophonicâ loquens: "Istud periculum" inquit „non evanescet per septimanas aut menses". Idem successor Antonii Blair cives denuo rogavit, ut essent quam vigilantissimi, sed simul eosdem flagitavit, ut adversus gradum periculi tromocratici summum „pergerent vivere more solito".
|
Astyphylaces in Heathrow aeriportu Londinensi custodientes: Quinque viros suspiciosos esse arrestatos
|
"Equidem scio" Gordonus inquit „populum Britannicum animo firmo fortique fore concordem". "Nos non cedemus, nos non patiemur terreri nec ulli permittemus, ut tolleret nostrum modum vivendi Britannicum". Tromocratiae "numquam posse rationem reddi, quasi esset actio fidei religiosae", sed eandem manêre „omnibus condicionibus actionem mali". Magnam Britanniam periclitari ab hominibus, qui rationem haberent ad rete tromocraticum Alcaidanianum.
Lord Stevens, officii astynomici Scotland Yard prior praeceptor, Gordonii consiliarius antitromocraticus, explanavit attentatores usos esse "iisdem rationibus bombas fabricandi technicis ac eorum sodales Bagdatenses". Inveniri etiam etiamque indicia, quibus concludi posset tromocratas Alcaidaianos in Magnâ Britanniâ natos interim ex Iraciâ et Afganistaniâ reversos esse, ut ducerent greges tromocratarum Britannicos.
TIMOR DOMINATUR IN MAGNÂ BRITANNIÂ: GUBERNATIO DECLARAT GRADUM PERICULI SUMMUM
|
Paucis horis post attentationem in aedificium aeriportûs Glascuensis factam astyphylaces obsaepiunt etiam aeriportum Liverpooliensem.
Glascuâ in urbe hominibus est relinquendum aedificium aeriportûs.
Quidam vir filiolum aufert in locum securum.
Omnes volatûs praedispositi tolluntur, peregrinatoribus est ...
... cum sarcinis suis aeriportus relinquendus
Astyphylaces aditûs custodiunt.
Mamuchio in urbe astyphylax graviter armatus custodit introitum aedificii terminalis.
Etiam in USA acriores factae sunt rationes securitatis. In aeriportu Bostoniensi officialis cum cane odorisequo bombarum indagatore aufert sarcinam possessoris expertem.
In internationali aeriportu Angelopolitano autocineta acrius custodiuntur.
|
Iacoba Smith ministra rerum domesticarum sessioni commissionis criseos gubernantium moderata affirmavit Britannos non terreri. Iacoba: „Cives" inquit „adhortamur, ut astynomis nuntient omnes eventûs suspiciosos."
Investigatores antitromocratici primo arrestaverunt quinque viros suspiciosos. Inter eos fuerunt etiam ambo attentatores (quales esse putantur), qui die Saturni curru gepico ardenti rapidissimê invecti erant in aeriportum Glascuensem. Die Solis perquisitae sunt complures domus prope aeriportum sitae. In stratâ autocineticâ in Angliâ boreali sitâ deinde mane diei Solis comprehensi sunt duo viri suspiciosi. Postea perquisita sunt habitacula oppidi Newcastle-Under-Lyme, quod situm est inter Mamuchium et Birminghamium. Liverpoolio in urbe arrestatus est quidam vir 25 annos natus, ibi quoque perquisita sunt duo habitacula.
TIMOR TROMOCRATIAE: IN AERIPORTU GLASCUENSI HOMINES TERRORE PANICO CORREPTI
|
Cooperatores aeriportûs et epibatae aeriportum Glascuensem relinquunt.
Currus gepicus flagrat: Qui a duobus viris gubernatus est in aedificium terminale.
Siphonarii rapidê vecti sunt ad locum facinoris ...
... et extinxerunt currum flagrantem.
Autocineto disploso aedificium terminale graviter afflictum est.
Autocineti vectores ambo ab astyphylacibus sunt comprehensi.
In aeriportu Glascuensi puer parvus manu adultae ducitur in locum securum.
In aeriportu Glascuensi omnes volatûs praedispositi sunt sublati. Epibatae aufugêrunt in locos securos.
Servatores agentes: Uno die post attentationes Londinenses etiam Glascuâ in urbe homines corripiuntur timore tromocratiae
Epibata cum sarcinâ suâ relinquit aeriportum Glascuensem.
Astyphylaces epibatas certiores faciunt ...
... quomodo possint relinquere aeriportum quam celerrimê.
Post displosionem astyphylaces custodiverunt autocineta in aeriportu statuta.
|
Vir suspiciosus, qui astyphylacibus vigilantibus in nosocomio iacet, diei Saturni tempore postmeridiano ustulationibus affectus est, cum currus gepicus in aeriportus Glascuensis aedificium terminale proreptus inflammaretur. Autocinetum viride aedificii terminalis portis vitreis diffractis distantiâ paucorum metrorum ante ordinem epibatarum exspectantium in loco constitit. Quidam peregrinator: „Isto curru" inquit „si usque ad homines pervasisset, homines interfecti essent aliquot centum".
Ambo currûs vectores ab astyphylacibus comprehensi sunt. Quinque homines prope currum versati curati sunt propter vulnera, unus propter crus vulneratum in nosocomium erat transportandus. Duobus milibus quingentis epibatis aeriportus statim relinqendus fuit. Sôlis demum die aeriportus denuo apertus est.
Astynomi putant claram esse cohaerentiam inter facinus Glascuense et ambas attentationes Londinenses. Magistratûs dixerunt in omnibus vehiculis fuisse magnas copias materiarum accensivarum. E circulis Britannici officii securitatis emanavit indicia esse, quibus appareret impetum Glascuensem praedispositum fuisse ut attentationem suicidialem.
Post meridiem prope Glascuam vehiculum quoddam suspiciosum displosum est. Locutor astynomicus homines certiores fecit idem vehiculum habere quandam rationem ad attentationem in aeriportu frustra factam. Displosio consulto praeparata est ab ipsis astyphylacibus in areâ stativâ nosocomii Alexandrae Regiae, ubi curatur unus ex attentatoribus (quales esse putantur).
Hanc relationem d.01.m.Iulii a.2007 h.19.17 in periodico interretiali „Spiegel online" editam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: http://www.leolatinus.com/
Scripsit Nicolaus Gross
| 
