De muro ultimo

Cyprii Graece loquentes murum illum demoliri coeperunt, qui Nicosian caput insulae bipertit, ultimam urbem in duas partes divisam. Nuntius Graece loquentum rectorum dirutionem die Sabbati primo diluculo perficiendam esse promisit, ut per viam Ledran appellatam utrolibet transire liceat: unde ab anno MCMLXXIV armati utriusque partis arcebantur. Cum enim exercitus Graecus vi rerum potitus esset, Cypri insulae tertia pars a Turcis occupata est, urbis maximae dimidia; pars Graeca in Unionem Europaeam nuper accepta est.

Anno MMIII auctoritates Turcarum, interdictionibus partim levatis, quinque in locis transitum dederunt; sextus abhinc erit transitus Ledrae. Christolous Pashardis, minister primarius Cypriorum Graece loquentum, sperat pari cum benevolentia Turcas de inopinata dirutione assensuros esse. Multitudo strepitu minime exspectato expergefacta operae plaudens adfuit.

Scripsit Herimannus Novocomensis