De Hafniae tumultu

Centum homines circiter a custodibus publicis Hafniae comprehensi sunt qui quietem nocturnam iterum perturbaverant, postquam urbis auctoritates occupantes Domus Iuventutis (Ungdomshuset) in insula Pontis Septemtrionalis (Nørrebro) expellere constituerant. Aedificium illud, a iuvenibus laevae partis fautoribus iam diu occupatum, anno bismillesimo societati cuidam Christianae venum datum est: quae nuper iussum exactionis obtinuit. Ideo custodes publici insulam Pontis Septemtrionalis omnemque vicum Christianam appellatum postridie Kalendas Martias occupaverant, ne rebelliones noctis superioris iterum fierent.

Saturni die tamen multo mane cum reclamantes autoraedas incendere lagenasque benzino exardescentes eicere coeperunt, tum astynomi vapores lacrimis suscitandis aptos disperserunt. Nuntius publicorum custodum centum reclamantes in insulis Pontis Septemtrionalis et Christiani Portus (Christianshavn) comprehensos esse dixit, postquam Kalendis Martiis ducenti capti erant; novos demum tumultus die Dominico exspectandos esse. Nuntius reclamantum contentioni nullum finem impositum iri proclamavit, dum sit Hafniae Domus Iuventutis. Captivi multis ex Europae civitatibus necnon ex Nova Zelandia et USA oriundi esse narrantur.

Danorum minister primarius Andreas Fogh Rasmussen rebelles vehementer condemnavit.

Scripsit Herimannus Novocomensis