OBSCURISSIMA HORA

Darkest Hour 2017 UK

Dispositoris scaenarum: Joe Writh. Histriones maximi momenti: Gary Oldman, Kristin Scott Thomas, Ben Mendelsohn, Lily James, Ronald Pickup, Stephen Dillane.

Opus filmicum dispositoris scaenarum Joe Writh de vicibus Ministri Primarii Winston Churchill tractat, incepto ab uno anno Secundo Bello Mundano, qui anno MCMXL priori Ministro Neville Chamberlain in munus successit. Regnum Unitum in gravissimo discrimine versatur, cum ei decernendum sit utrum cum Germania pacem statuat an bellum pergat. Exercitus nazistarum paulatim Europam occidentalem occupat, minatur se Britanniam invadere. Quamquam rex Georgius VI et pars Optimatium ei obstiterunt, die decimo mense Maio societatem conflans cum Laboristis, gubernaculum regni habuit, decessore quoque favente.

Iam nazistae irruperant in Bataviam, Belgium, Francogalliam, ubi exeunte mense Maio, ineunte Iunio, reliquae vires Francogallicae Belgaeque cum agmine Anglico, in pugna apud portum Dunkerque, obsessae, paulatim mari mirum in modum ad Britanniam traiectae sunt. Cum ita res essent, omnes administros adhortatus est ad resistendum ne Regnum Unitum imperii Hitleriani servus fieret, secumque totam nationem cum ipso rege per orationes radiophonicas traxit.

Histrio Gary Oldman, in figuram illustris viri multo fuco mutatus, optime primas partes agit in pellicula quae, praeter historiam, personae privatos mores ostendit, saepe reprehensione dignos: e.g. epistulas a cubili seminudus dictare solet, vestem cubiculariam toto die domi induit ; sumens mane, meridie et vespere potus alcoholicos, alcoholismo affici videtur, ut consuetum tabacum omittam. Haec hominis vitia fabulae historicae gravitatem mitigant et spectatores attentiores reddunt. Inter alia, duobus praemiis Ansgarianis, ob optimum histrionem et optimum fucum, pellicula exornata est.

Scripsit Lydia Ariminensis