EXODUS

Puer in vidulo imago tragica belli Syriaci

In urbe Damasco pater puerulum in vidulo fert: haec imago photographica signum existimatur migrationis ab oppidis regionis Ghoutae orientalis, a compluribus diebus obsessis. Specula Nationis pro iuribus humanis rettulerunt plus quam centum cives die Veneris ob pyrobolos coniectos occisos esse. Immo Ordo Nationum Unitarum monet proelia rursus ubicumque Syriae prope redintegrata esse. Sic stantibus rebus Astanam iterum convenerunt administri negotiis exteris praepositi nationum quae sponsores debuissent imminutionis belli, Russia, Turcia et Persia; quae praeterito anno munus commune constituerunt ut vim coercerent et integritatem territorii servarent.

Legatus specialis ONU Staffan De Mistura, cum per apparatum recipiendis reddendisque imaginibus televisificis cum Consilio Securitatis locutus esset, nullam armorum intermissionem de qua disputaretur esse edocuit. In trium hebdomadarum spatio MD mortui numerantur. Nunc copiae praesidis Bashar Assad cum Russicis itinera parum tuta profugis reliquerunt; prope viginti milia feruntur ad munitiones Syras novissimis horis pervenisse.

Scripsit Lydia Ariminensis