Elephantes mortem unius suorum lugentes

Triginta elephantes lugebant mortem parvuli suorum, ab autoraeda publica casu pulsi et occisi - nuntiant Keniensia acta diurna "The Standard". Elephantulus viam publicam Mombasa-Nairobi, periculi inscitus, transgredi conatus sit. Quem cum alii huius gregis elephantes iacentem in via invenissent, vigilias prope cadaver parvuli tenere statuerunt, cursum autoraedarum ullum in ambas directiones prohibentes. Proboscidibus minanter canentes, non sinebant elephantes hominibus, inter quos et peregrinatores autoraedae publicae, propius aggredi, locumque relinquere minime voluerunt, nisi a vigilibus lucorum sclopetis pneumaticis perpulsi. Caro iuvenis elephantis agricolis ibi habitantibus ad vescendum data est.

Quod lugendi elephantium phaenomenon iam longe scientistis disciplinae biologicae notum est. Primum elephantes creduntur statum iacentis experiri, videlicet sperantes eum resuscitandum adhuc esse. Cum tamen mortuum sine dubio invenerent, vigilias tenent, saepissime usque ad proximum occasum solis. Hoc in photographemate in Betsuana facto videtis elephantem cadaver alterius contra leonem, carnem recentem cupientem, protegere, aliosque elephantos vigili solitario in auxilium adcurrere.

Scripsit Nanompouphos

Scripsit Nanompouphos