CRATER NUGARUM 21 MAII

QUOT PENDET ANIMA?

Anno 1907 medicus Americanus nomine Duncan MacDougall posuit sex morituros aegrotos in lectos subtillimis trutinis instructos, ita ut pondus aegroti semper accurate indice trutini monstrabatur. Invenit MacDougall omnem sex hominum tempore mortis circa 21 grammatibus leviorem fieri, quod pondus animae esse putare coepit. Quod inventum confirmatum esset alio experimento: observatione ponderis 15 canum morientium, quorum pondus tempore mortis minime mutatus sit, nam - ut bene a theologia Christiana scimus - animalibus anima deest. MacDougall nova experimenta cum hominibus perficere in animo erat, sed mortuus (i.e. 21 g levior) ipse est anno 1920. Anno 2003 dispositor Alejandro Gonzalez Inarritu cinema fecit "21 grammata" experimentis MacDougall inspiratus.

Fraga insaniam apud ea edentes invocant! - praemonuit anno 1906 (uno igitur anno ante pondus animae inveniendum) alius medicus Americanus, E.P. Blomer. Cuius experimenta multo simpliciora erant: notabat enim numerum mente captorum unoquoque mense in phrenocomium urbis Denver, ubi ei munus tunc erat, acceptorum invenitque mense Maii, quando fraga recentia in agris colliguntur, hunc numerum multo maiorem esse aliis mensibus comparato.

Alcoholia simiae bibunt eodem modo ut homines! Studiosi enim Institute of Health Animal Center urbis Maryland experimentis monstraverunt rhesos (est genus simiae seapissime in laboratoriis adhibitum) plus ipsorum voluntate bibere, cum solitarie per tempus quoddam vivere coacti sint at minus, cum vitam hilarem in grege agere possent. Inventum etiam sit rhesos, qui per totum diem labores aliquos perficere coguntur, fine diei libenter poculum temeti sumere.

Photographemata feminarum ut omnino non divulgent, rogavit editores actorum diurnorum Saudicorum rex terrae Abdullah. Nam, ut explicavit, iuvenes ducuntur anima et commotionibus, sed anima etiam interdum se amittere potest. Adhuc licuit imagines mulierum capite rica obtecto, sed facie aperta, in ephemeridibus Arabiae Saudicae monstrare.

Iudaeis flavas, Christianis rubras, Zoroastranis autem caeruleas taenias manicae vestis affixas mox in publico ferre mandatum a parlamento Persarum erit - nuntiat ephemeris Canadiensis "National Post". Causa sit, ne Mahumetani casu in communionem cum "infidelibus" incidant. Nihil in nuntio de colore atheistis Iraniae reservato...

Aves, quae homines ut praedam captare solebant, credit ante 2 mln annorum in terra exstasse Lee Berger, anthropologus Meridiafricanus.

Scripsit Nanompouphos