Crater nugarum die 30 Aprilis Varsoviae in lucem divulgatus

DRACONES ADHUC NECANT...

Circa 1400 homines (non omnes iuvenes!) apprehensi sunt a vigilibus publicis regionis Pakistaniensis Lahore, quod ibi officialiter prohibito ludo draconum volantium lusissent. Qui ludus per totum mundum, ubi adsint tantum venti, tam bene notus, in aerem scilicet mittendi ludibria avili- vel draconiformia e charta levi facta, in Pakistania occidentali tempore Basant (i.e. festi veris advenientis) ab omnibus quasi bacchanientibus exercetur: ultimo praeterito anno septem homines hac occasione vitam amiserunt, postquam in draconum resticulas (saepe metallo restem firmando intertextas) incidissent, dum sex alios animam efflaverunt dracones mittendo e tectis aedium decidentes. Plus quam 500 vulnerati sunt, quod regimini satis erat, ut ludum a sequente anno prohiberet; frustra, ut patet. Explicandum remanet Pakistanos versione aliquantum bellicosiori draconum volandi utuntur - victor ludi is evadit, cui contigat rete sui draconis funes aliorum persecare. Ita ut omnes, praeter suum, dracones in excelsis evanescant.

Amor matris erga filios filiasque a multitudine manganii, quem cum cibis sumant, omnis pendet: si deficit in corpore manganium, rumpit amor matris etiam carissimae - nuntiat, experimentorum perfectorum fretus, doctor Elmer V. McCollum universitatis studiorum John Hopkins. De his rebus acta "Herald Tribune" nuntiaverunt ante 75 annos, mense scilicet Aprilis exeunte anni 1931. In experimentis matres murum - invitae, puto - participaverunt .

Gregi vervetarum (Cercopithecus Aetiops), quod genus etiam a nonnullis chlorocebus sive simia viridis vocatur, quo 44 mares et 44 feminae iuvenes continentur, experimento data sunt a studiosis Texas A&M University varii generis ludibria puerorum. Inventum est omnes fere simiae masculi elegerunt ad ludendum autoraedas vel pilas, "puellae" tamen animam statim adverterunt in pupas necnon vases culinarias.

Aquilam Polonorum, monstratum in veterrimo adhuc invento eorum nummo, i.e. denario regis Boleslai Chrobry, minime aquilam sed pavonem esse vult professor Stanislaus Suchodolski Instituti Archaeologiae et Ethnologiae Universitatis Varsoviensis, nam avis in nummi imagine caudam sine dubio pavoninam praebeatur nec desit ei in capite cristula pavonis. Ita non a Romanis sed Persis (ambobus in casibus certe indirecte), ubi pavo symbolus immortalitatis erat, insigne natonale Polonis traditum esse. Specta, lector care, iudicesque ipse!

Elige, Batman: genitalia magna aut cerebrum magnum, ambo simul non dantur. Talis regula - secundum actorum Polonorum "Wiedza i Życie" (Scientia et vita) - valeat pro mammalibus, at certe pro vespertilionibus, quibus cum magna sint genitalia, cerebrum semper parvum.

Causa solitudinis in 48% genoma est, in 52% autem effectus actorum hominis - invenerunt studiosi Americani et Batavi, 8387 scidulis percontativis iuvenum hominum ab iis perlectis.

Scripsit Nanompouphos