Page normale sans titre
"The Beatles" a se
ipsis visi
Constat societatem radiotelevisificam
Anglam BBC, causa commemorandi diei necis Johannis Lennon, quae nex evenit die
VIII mensis Decembris anno MCMLXXX, eo die quo quidam Marcus
David Champan (adhuc homo plane ignotus) usque ad octo glandes in
corpus cantoris ante ipsius domus fores immisit, percontationem
mox emissuram, in qua ipse Lennon necnon Georgius Harrison atque
Ringo Starr se "obsaturatos ea fama, quae ipsos Pauli
McCartney acolytos praeberet" palam confitentur. Ea enim
percontatio facta est anno MCMLXX atque in lucem editam in
ephemeride nomine "Rolling Stones" patet.
" Brian Epstein defuncto" Lennon inquiebat
"Paulus imperium tenuit et, ut saltem videbatur, is nobis
praeerat, sed qua ratione is nobis praeesse valeret, is qui ulla
sine intermissione atque cursu pervagari non desineret?"
Talia verba dicta erant octo menses antequam musicus grex
laniaretur: societas enim musica componens a Lennon necnon Paulo
coniuncta, quamquam grex anno MCMLXXI palam atque omnino divisus
fuit, Johannis Lennon sententia multo ante confecta erat,
"circiter annum MCMLXII".
Sed maximi momenti
percontationis locus ad Angli gregis comitantium coronam pertinet:
ipse Lennon eum circulum "mobilem Romam" nominare non
dubitavit eo, quod argento, ganea necnon pharmacis refertum
unusquisque comitantium nihil aliud nisi in eo globo inesse
expetebat. (Scilicet autem opinio Lennon de antiqua Roma non
multum differebat ea, quam plurimi hodierni,
praecipue memores illius pelliculae nomine "Quo
vadis"et nonnullarum similium, sustinent). Nihilominus tamen
membra eius eximii cantorum gregis, iudicio Lennon, eum sordidum
mundum relinquere nunquam volebant, ibi ubi "domus,
autoraedae, concubinae, uxores, ludi, potus pharmacaque"
abundabant, ita ut, Lennon loquente, ipse et uxor Yoko Ono ad
diamorphinam consumendam momento ceterorum "Beatles" et
eorum circuli venerint. Quae cum ita sint, illa pulcherrima imago,
quae "The Beatles", bonos pueros adhuc praebebat,
facere non potest quin evanescere incipiat...
Ceterum Lennon non vitat Mick
Jagger accusare eo, quod eius sententia cantor gregis
"Rolling Stones" plagiarius nonnullorum carminum factus
est. De qua re "valde placeret mihi" Lennon inquiebat
" quod facerem indicem eorum carminum a nobis creatorum et
quod ea conferrem iis, quae "Rolling Stones" duobus
post mensibus edebant".
Scripsit Ansgarius Legionensis
|