Colchica autumnalia seu Feminae sine occasu

(Die Herbstzeitlosen)

Helvetia - anno MMVI

Direxit: Bettina Oberli, scripsit: eadem cum Sabine Pochhammer, produxerunt: Catpics Coproductions AG et Rete Televisificum Helveticum, partes maximi momenti egerunt: Stephanie Glaser, Hanspeter Müller-Drossaart, Heidi Maria Glössner, Lilian Naef, Annemarie Düringer, Monika Niggeler, Monica Gubser, Manfred Liechti, Peter Wyssbrod, Alice Brüngger.

In scaenam traduxerunt: Stéphane Kuthy et Michael Schaerer, sonos curavit Marc von Stürler, musicam delegit: Luk Zimmermann, actionem direxit: Monica Rottmeyer, illuminationem curavit: Eric Steingroever, vestimanta curavit: Greta Roderer, actores delegit: Corinna Glaus, distribuit: Catpics Coproductions AG.

Ecce vividum cinema salibus omnibus plenum e remotis vallibus Alpinis, armentis tantum et caseo in orbe nominatis. Minimus vicus Trub im Emmental (Emmental est enim inscientibus "Tal", id est vallis, fluminis Emme, quod in amnem Arurium affluit, in Rhenum influentem) scaenam aptissimam praebet huic pelliculae iuvenis auctricis Helveticae Bettinae Oberli, in magno foro Locarni die IV mensis Augusti primum demonstratae. Aderat cum multis, qui cinemati perficiendo operam dederant, histrio apud Helveticos germaneloquentes celeberrima Stephania Glaser, hodie sex et octoginta annos nata, quae in comoediis levibus et emissionibus televisificis per annos sexaginta celebris fuit: quam aniculam primarum partium actricem voluit auctrix, ut ducem parvi gregis quattuor feminarum minime taedium et maestitiam aetatis tolerantium.

De improviso constituunt parvam tabernam cibariorum in emporium interiorum indumentorum muliebrium ad virorum excitationem aptorum convertere, contra omnium propinquorum conciviumque opinionem. Hilaritetem summam excitat comoedia plerumque vehementi oppositione severorum et hypocritarum, quorum opiniones latissime praevalentes minime anuum voluntatem deflectere possunt. Addetur iis, qui pelliculam Helveticogermane actam spectaverint, delectatio sermonis illius, qui parum intelligitur ab omnibus, qui eo non utuntur.

Optimum est etiam Helveticos in semetipsis aliquando ridere!

Scripsit Herimannus Novocomensis