De morte et amore

"Fratelli a un tempo stesso amore e morte / ingenerò la sorte" versus est Jacobi Leopardi, poëtae Italici praeclari, qui in hexametrum conversus resonat: "Mortem et amorem sors fertur peperisse gemellos", aptissimus infelici fato iuvenis et puellae sponsorum Fori Livii (Forlì), non longe ab ora Hadriatica.

Qui noctu, die ultimo mensis Aprilis dimidia hora coepto, coniunctim nonnullis horis consumptis, casu viario vitam amiserunt. Quod solitum letale factum reputari posset, nisi Maurus undetriginta annos natus et Simona septem et viginti separatim locis in longinquis alter birotam automatariam altera autoraedam, suam quisque domum rediens, conduxissent. Ambo celeriter procedentes tempore eodem via deverterunt et subita morte deprehensi sunt.

Scripsit Herimannus Novocomensis