Annus
2 0 0 6


BELLUM VINARIUM KREMLINI CUM MOLDOVIA ET GEORGIA

BELLUM VINARIUM KREMLINI CUM MOLDOVIA ET GEORGIA

E pegmatibus tabernarum Moscoviae necnon aliarum urbium Russiae modo evanuerunt res, quas crederes semper ibi mansisse semperque mansuras: vina Moldoviana et Georgiana. Nec Iosephus Stalin, si adhuc viveret, posset mittere secretarium suum Laurentium Beriam, ut in vicinitate Kremlini inveniat a dictatore maxime amata genera - Kindsmarauli et Kvantskara.

Causa rei consilium est ante septimana latum summae auctoritatis sanitariae Russiae Rospotrebnadzor haec vina non plus in terram esse importanda ob venena pesticidalia necnon nonnulla metalla gravia in iis inventa. Mox prohibitum est quoque ex his terris invehi alia alcoholia, in quorum numero etiam praeclara vina Coniacensia. Regimina in Tbilisi et Kisynev maxime huic consilio reclamant, monstrantes vina eorum pura esse, salubritati minime nocentia, cui rei testes certificationes iis attributae a societatibus internationalibus vinis aestimandis. Causa vera consilii Kremlini esse - dicunt Georgiani et Moldoviani - crisis politica inter Moscoviam et has ambas civitates, meliores relationes cum terris occidentalibus necnon statum membri NATO et UE obtinere petentes. Ambabus adsunt inclavia rebellantia a regimine Moscoviensi adiuta, ubi copiae Russicae Georgianis Moldovianisque invitis quasi paci tuendae manent, quae inclavia sunt Transnistria (in Moldovia), Abkhasia et Osetia Meridionalis (in Georgia).

Oeconomice damnum non parvi momenti ambobus civitatibus id fore: Russia importare solebat plus quam 80% omnium vinorum a Georgianis peregre venum datorum, quod simul sit 9% totius exportationis huius terrae. Pro Moldovia similia ratio valebat - 75% mercaturae peregrinae vinorum et 19% totius exportationis. In Moldovia venditio peregrina vinorum fons 30% totius productus nationalis adhuc erat. Cuius terrae minister oeconomiae et mercaturae Valery Lazar a "The Wall Street Journal" rogatus: Sine dubio in damna magna incurremus. Sed nunc saltem scimus nobis alia fora invenire necesse est.

Damnum tamen quoque amatoribus vini Russis - 43% omnium vinorum in hac terrae consumatorum e Georgia aut Moldovia venere solebant. Nunc aliis e terris vina importari debebunt, maiore sine dubio pretio.

In photographemate: 'kvevri', id est amphorae, in quibus vinum generis Saperavi maturatur in regione Georgiana Kvareli

Scripsit Krakauer



Retro ad:

Novissima editio
Summum paginae