Annus
2 0 0 6


Anno

Oeconomiam mundanam emendabunt emptores Asiani?

Recessio oeconomiae Americanae, quam nonnulli periti praedicunt anno proximo futuram, aliquantum emendari poterit emptionibus ab Asianis factis - legitur in ultimo fasciculo actorum hebdomadalium "The Economist".

Recessio effectus sit nimiis in ultimis annis emptionibus, quae cives Americani temere perficere solebant, saepe pecunia credita utentes, quam nunc, oeconomia peius se habente, difficilius iiis reddere argentariis erit. Iam nunc emptiones domorum in USA multo minores fiunt, quam ante nonnullos menses; itaque pretia immobiliorum cadunt, structiones multae inceptae infinitae manent, emptoribus difficillime inveniendis. Cives Americani nondum auram crisis sentiunt, nam numerus hominum sine opere nondum est magnus et, imprimis, pretia petrolei ultimis duobus mensibus 30% decreverunt; mox tamen "effectus nimiae consumptionis" graviter marsupia eorum afficere potest.

Antea semper omnis, licet parva, recessio Americana, directe laedere solebat terras peregrinas et imprimis exportatores Asiae Orientalis: Americani plus non potuerant talia ab iis emere, quae adhuc solebant. Nunc tamen plerique magni lusores Asiani mercaturae mundanae - ut sunt Sinae, India, Corea Meridionalis, Malesia aut Indonesia - iam non tam exportatione mercium suarum crescunt quam quaesitu domestico; solae terrae regionis quae exportatione maximam partem lucri faciunt sunt Formosa (Taiwan), Singapur et Hongkong. Aliis verbis: pauperi Asiani interdum aliquantum divitiores facti sunt, ipsi nunc non tantum merces fabricantur, sed etiam emunt - non solos merces peregrinas, ut sunt exempli gratia vina Francogallica, emunt quoque societates commerciales occidentales maximi in mundo momenti.

Si ergo Americani, paulum pauperiores ad tempus extemplo redacti, minus solito mercium emant, nulla aut saltem parvula crisis id verisimiliter sit mercaturae mundanae, ubi primi emptores iam nunc Asiani sunt. Quod patet etiam ex eventibus ultimorum trium dierum: maxima post memoriam gentium venditio publica syngrapharum (Anglice Initial Public Offering sive IPO) a Sinis peracta est, ubi 14.8% tesserarum argentariae Industrial & Commercial Bank of China pretio 19.1 miliardorum USD emptae sunt; 8.6 miliardis USD gigas ferreus Indus Tata Group emit Europaeam (imprimis Britannicam) societatem metallurgicam Corus et statim consilia divulgavit novarum emptionum in Vietnamia, Indonesia, Brasilia, Argentina et Uruguaia peractarum; fabricator et venditor mercium luxuriosum Gianni Versace SpA, qui quinque iam tabernas in terra Sinarum possidet, nuntiavit se 14 novas ibi aperturum ante finem anni 2007.

Oeconomiae periti monent tamen Asianos non esse necnon longe fore remedium omni crisi oeconomicae globali. Recessio Americana, si re vera fiat, dolenter percutere possit mercaturam mundanam (quoque Asiaticam) imprimis in area bursarum syngrapharum, quae bursae fere omnes arcte cum foro Neoeboracensi iunctae sunt. Si ergo Dow Jones cadit, plerumque cadunt et aliae syngrapharum indices.

Scripsit Du Shida



Retro ad:

Novissima editio
Summum paginae