Annus
2 0 0 6


89

De meschita diruta atque ultione Shiitarum

Aurea meschita Ali Al-Hadi in urbe Samarra pyrobolo diruta est, quam ob rem multa milia Shiitarum Iraquiae vias et fora reclamantes occupaverunt, alii pacifice, alii arma gerentes, alii imagines ducis religiosi Ali Sistani ostendentes.

Mercurii die multo mane manipulus armatorum Al Askaryia monumentum inierunt et custodibus captis pyrobolum in aede collocaverunt: paulo post diruptione corruit templum cum antiquo tholo ex auro (in imagine demonstrato). In meschita sepulcra duorum imam ex Mahometi successoribus iuxta Shiitarum traditionem servata sunt: urbs Samarra, turri spirae modo exstructa quondam celebris, caput omnium Islamicarum terrarum saeculo nono post Christum natum facta est, ibique plurima magnifica palatia horti meschitae illo tempore aedificata sunt.

Furor Shiitas totius Iraquiae commovit, cum nuntius nefandi sacrilegii divulgatus est: urbes reclamantibus redundare, fere LXX meschitae Sunnitis sacrae obsideri atque dirui, LXXX circiter homines plerumque Sunnitae tumultibus perire.Constat et unum diurnarium duosque operarios, alterum sonitus alterum imaginum peritum, televisionis Arabicae Al Arabiya vitam in urbe Samarra amisisse.

Iovis die Bagdati viae desertae videbantur, neque cuiquam domo exire auctoritatum imperio licebat. Custodes publici adnuntiaverunt XLVII victimas Sunnitas in urbis insula meridionali Abu Dshier compertas esse, quae oculis opertis vinctae et armis igneis ictae erant. Etiam ceteris in urbibus Sunnitae occisi esse narrantur, consilio gregis Shiitae ab imam Moqtada al Sadr ducti, qui novo regimini auxilium praesidiumque praebet.

Vane vana eloquitur Consilium securitatis ONUs: se populum Iraquicum exhortari, quamquam sollicitudine ob tantas caedes excitatum, ut aequum et concordem animum homicidis demonstret.

Scripsit Herimannus Novocomensis



Retro ad:

Novissima editio
Summum paginae