Ioannem Rau virum praesidialem Germanum mortuum esse

Ioannes Rau, qui ab anno 1999 usque ad annum 2004 Reipublicae Foederali Germanicae praefuit, septuaginta quinque annos natus Berolini mortuus est. Rau diu morbo gravi laboravit. Horstius Koehler praeses rei publicae ad diem 7 mensis Februarii funus publicum imperavit.

Ioannes Rau anno 1931 in urbe Vuppertal filius praedicantis natus est. Mature in rebus publicis versatus est. Plures annos Partium Popularium Pangermanicarum fuit. Partibus his anno 1957 dissolutis in partes Democratarum Socialium transivit et ab anno 1958 conventui legatorum Rhenaniae-Vestfaliae interfuit. Anno 1978 praepositus Rhenaniae-Vestfaliae creatus est. Hoc munus usque ad annum 1998 obtinuit. Denique anno 1999 praeses VIII rei publicae factus est. Laudes imprimis adeptus est, cum anno 2000 in conventu legatorum Israelitarum primus Germanus verba faceret. Ipse dixit se temporibus his duo officia praesidis rei publicae videre: unum, quod pro Germanis omnibus diceret, alterum autem, quod numero inferioribus vocem daret.

Pater et maritus Ioannes Rau uxorem tresque liberos relinquit. Mors eius et domi et peregre luctum excitavit.

Scripsit Stefan Weise Halensis