Ali Agca liberandum esse

Ali Agca, civis ex Turcia qui iuvenis XXIII annorum pontificem maximum catholicum Iohannem Paulum II sclopetando occidere anno MCMLXXXI conatus est, libertas ab iudicibus Turcis die XII mensis Ianuarii restituetur: hoc adnuntiavit unus ex rei patronis. Anno MM Ali Agca venia a praesidente rei publicae Italicae, ubi poenas per XIX annos solverat, donatus erat; reo pontifex ipse iam sua sponte ignoverat, eum in carcere visitans (ut aspicitur in imagine). Inde in patria sua poenas decem annorum solvere coepit, quod diurnarium occidisset et praedatus esset; post dimidiam partem poenae, quod in vinculis bene se gesserit, libertatem meruit.

Cum vinculis in perpetuum ab iudice Italico condemnatus est, sententia denuntiabatur "verticem tantum emersum esse machinationis cuiusdam ignotae ab obscuris viribus contextae." Alii ergo iudici requirenti mandatum est, ut accuratius de insidiis pontifici paratis earumque causis indagaret. Ita considerata sunt Ali Agca itinera ante facinus: de nonnullis exploratoribus Turcis et Bulgaris investigatur, denique ante tribunal sex cives Bulgari deferuntur, quorum unus condemnatur, quod arma homicidae praebuisset. Sed omnia obscuritate involuta manent. Nullum auxilium indagatoribus ab ipso Ali Agca affertur, qui saepissime facinoris sui novas singularesque causas enuntiat. Parentes Emanuelae Orlandi, adulescentis Romanae a mense Iunio anni MCMLXXXIII ex omnium conspectu nulla praemonitione evolatae, etiam nunc sperant Ali Agca liberum quidvis puellae inveniendae utile pronuntiet: quod iam diu reus palam promiserat.

Frigide nuntius Vaticani communicavit nihil de rei liberatione sibi praenuntiatum esse consiliaque auctoritatum Turcarum respectanda esse.

Scripsit Herimannus Novocomensis