Annus
2 0 0 6


70

Ucrainae methanum deesse

Kalendis Ianuariis civibus et officinis Ucrainae methanum a Russis iam non suppeditabitur: hoc constituit ultimo anni die societas Gazprom, cuius possessor est res publica Russorum, quae pretium fere quintuplicatum petiverat. Quamvis pactio proxima videretur, pretium vaporis naturalis a Kalendis Aprilibus augendum esse neque usque ad illam diem quidquam permutandum, Gazprom vesperi pridie K. Ian. nuntiavit propositum Russorum a moderatoribus Ucrainis reiectum esse, ergo a Kalendis Ianuariis methanum Russorum, pars tertia totius roboris illic consumpti, in domos et officinas Ucrainae non amplius distributum iri. Societates methano distribuendo addictae negant calefactionem familiis defecturam esse, sed officinae haud parvas difficultates patientur. Unio Europaea veretur, ut civitatibus occidentalibus methanum a Russia per Ucrainam transiens desit, de qua re Brussellis iam pridie Nonas Ianuarias disceptabunt; sed praeses Russorum Vladimirus Putin quaestionem hanc constare negat.

Moderatores Ucrainae putant pretii incrementum ad hoc deliberatum esse, ut Victor Yuscenko, qui cum factione lutea partem maiorem suffragiorum adeptus est et ut Unionis Europaeae amicus rem publicam regit, infirmior ante oculos populi sui reddatur: nam nonnullae nationes, quae pars Unionis Sovieticae fuerant, methanum a Gazprom parvo pretio recipere pergunt.

Scripsit Herimannus Novocomensis



Retro ad:

Novissima editio
Summum paginae