De colloquiis in Colombia ad pacem restituendam habendis

Cubae, in insula mediae Americae, supremi duces gregis rebellium Colombianorum Exercitus ad Nationem Liberandam (ELN) cum moderatoribus patriae suae colloquia habere coepisse narrantur: etsi se de pace acturos esse negaverunt, hoc initium magnam spem omnibus attulit. Colloquiis favit praeclarus scriptor Colombianus Gabriel Garcia Marquez, praemio Nobeliano insignis, et adsunt legati trium civitatum Europaearum ut observatores. Nuntius de colloquiis habendis primum ante paucos dies divulgatus est, postquam minister regiminis Colombiae Ludovicus Carolus Restrepo et dux Exercitus ad Nationem Liberandam Franciscus Galan, reus ex carcere ad hoc dimissus, convenerant. Eiusdem generis pactiones anno bis millesimo tertio frustra coeptae sunt, sed proclamavit auctor Gabriel Garcia Marquez, legatos partium allocutus, ambos pudendum fore, si ad nullum exitum pervenerint.

Exercitus Colombianus ad Nationem Liberandam anno MCMLXV creatus est, ut regimen communisticum Cubae etiam in Colombia institueretur: quattuor millia hominum clam vivunt, rebellionem populi excitantes raptibus et damna bonis publicis afferentes. Qui ab USA et Unione Europaea ut grex terroristicus habentur. Cum moderatores, a praesidente Alvaro Uribe conducti, a rebellibus exquisituri putantur ut arma deponant, tum ELN postulabit ut condiciones pauperum eleventur. Minister pactionibus deditus Restrepo fiduciam rebellium sibi conquirere conabitur, quod difficillimum videtur: nuntius enim Exercitus rebellium sibi dixit primum persuadendum esse, cum regimine agere operae pretium esse: quod, si verbatim arguendum sit, videlicet moderatoribus ipsis comprobatum non esse.

Maximus ordo rebellium Colombianum FARC usque ad hunc diem noluit rectoribus, qui se colloquiis cum omnibus gregibus armatis promptos proclamaverant, ullo modo responsum mittere, quamquam praesidens Uribe zonam armis liberam institui concessisset, quo omnes partes convenirent. Cum gregibus armatis dexterarum factionum iam pactum est, ut acta violenta desinerent et copiae non legitimae dissolverentur.

Scripsit Herimannus Novocomensis