Astynomicos Sinenses interfecisse homines seditiosos

Magistratus Sinenses confirmaverunt custodes publicos incolas tres vici, qui Donghzou appellatur et inter septemtriones et orientem solem ab urbe Honcong situs est, interfecisse. Praefectum custodum, quia prava imperavisset, auctorem caedis fuisse et iam in custodiam datum esse.

Caedis causa tumultus fuit, quem incolae fecerunt, quia eis pretium minime aptum pro praediis domus electridem efficientis aedificandae causa traditis solutum erat. Tumultus iam die 6. m. Dec. factus est. Sed magistratus adhuc rem tacuerunt. Die 11. m. Dec. primum officialiter de eventu locuti sunt. Etsi autem rem primo silentio tegerunt, tamen magistratus Sinenses vitium confiteri mirum est. Testes autem et societates iuribus humanis servandis non tres solum, sed viginti minimum homines occisos esse dicunt. Si res se ita haberet, caedes maxima esset ex seditione in foro pacis caelestis anno 1989 exstincta.

Scripsit Stefan Weise Halensis