Polonio plures, quam antea putabatur, veneficio Londinii affectos esse

Latior in dies fit casus polonii veneficii. Nam Demetrius Kotvun quidam (quem in imagine aspicis), qui cum Alexandro Litvinenko in caupona quadam Londiniensi praesente exploratore Andrea Lugovoi Kalendis Novembribus convenerat, post percontationem cum Britannicis Russisque indagatoribus habitam graviter aegrotare coepit, forsitan comate sensum amisit: cuius amicus ac patronus Andreas Romashov nuntium illum falsum esse pro certo affirmat. Andreas Lugovoi etiam in nosocomio receptus est. Item septem homines morbo correptos qui in caupona eadem operam dabant polonium, id est materiam radioactivam letalem, in corpore habuisse compertum est: quamquam institutum saluti tuendae addictum quodvis periculum ceteris civibus adesse imminere negent.

Auctoritates Russorum de veneficio Alexandri Litvinenko olim exploratoris occulti investigare coeperunt, ut interfectorem, dum Russum, in iudicium vocent: Alexander Litvinenko praesidentem ipsum Russorum Vladimirum Putin moriens necis suae accusavisse narratur. Sed longe plura comperienda quam comperta esse videntur.

Scripsit Herimannus Novocomensis