De comitiis Congensibus

Duo candidati de sella summa Rei Publicae Congensis mense Octobri declinante inter se contenderunt: magistratum enim supremum diutius gerere praesidens Josephus Kabila cupiebat, quocum certabat Johannes Petrus Bemba (quem in imagine aspicere licet). Duodesexaginta fere consensuum centesimae priori, duo et quadraginta alteri tributa esse a consilio comitiis praefecto Mercurii die adnuntiatum est, sed minime decretus esse exitus videtur: nam J. P. Bemba, qui rebellibus belli civilis tempore praefuerat, eventum repulit se omnia licita experturum esse proclamans ut exitus sibi infaustus fraude commutatus subvertatur. "Mihi pro! mundanae societati nuntiandum est - inquit - exitum istum a me nullo modo acciptum esse, omniaque ex lege temptatum iri, ut voluntas populi Congensis observetur."

Quamquam comitiorum exitus a summo tribunali Congensi nondum consideratum sit, plerique observatores toto ex orbe omnia iure facta esse referunt. Mense Augusto praeterito fautores eiusdem J. P. Bembae vehementibus tumultibus cladi candidati restiterunt; Saturni recentissimo die ceterum quattuor homines rebus perturbatis perierunt, quadringenti - inter quos haud pauci pueri numerantur - in vincula coniecti sunt. Copiae ONUs ingentissimae totius orbis in capite Congensi, ubi praestant oppositores, creberrimae invigilant.

Scripsit Herimannus Novocomensis