Islandi balaenas denuo venantur

Longitudine 20 metrorum balaenoptera physalus - quod genus balaenarum nomine Germanico Finnwal commune notum est - in Oceano Atlantico 320 chiliometris ad occidentem a litore Islandico modo captus prima est victima consilii regiminis Islandiae, ne moratorium balaenos venandi longius observaretur.

Moratorio, quod ante 21 annos introduxit Commissio Internationalis Balaenopetarum, genera balaenarum, quibus exstinctio immineret, adhuc protegebat protegitque. Moderatores Islandiae putant tamen praeteritiis annis nonnulla genera horum mammalium in mari viventium tam late se propagasse, ut nunc ipsa detrimenti sint aliis animalibus marinis. Itaque licentiam balaenopetis regimen Reykiavikense dedit unoquoque anno venandi decem balaenopteras physalos necnon triginta balaenopteras acutorostratas.

Simili ratione ducti a multis iam annis non observant moratorium Norvegi. Venantur balaenas quoque Iapones, hi tamen dicunt se id facere solum necessitudinibus scientificis satisfaciendis.

Scripsit Nanompouphos