Annus
2 0 0 6


Barney ille Arctoctenos

Barney ille Arctoctenos

Plus quam centum ursulos lusorios "necavit" noctu canis vigilans nomine Barney, seminii doberman pinscher, cui munus erat ursulos hos, praeter alia crepundia, a furibus custodire.

Res evenit tempore exhibitionis ludibriorum in loco peregrinatoribus destinato nomine Wookey Hall Caves in Anglia occidentali. Secundum testes, canis repente coepit ursulos dilaniare, quo in processu pergebat usque ad adventum exercitatoris sui, ab administratoribus exhibitionis statim illuc invocati (ambo in photographemate videntur, post eos corpora ursulorum). Numero"necatorum" adest etiam ursulus nomine Mabel, anno 1909 in Germania fabricatus, qui postea ludibrium Elvis Presley, cantatoris illius fili rock-n-roll maximi momenti, fuisse creditur. A suo ultimo possessore Mabel emptus erat in auctione rerum olim ad cantatorem praeclarum pertinentium summa 75 milium dollariorum.

Nonnulli credunt saporem ipsius Elvis Presley rabiem in cane excitasse, alii in invidiam causam calamitatis ponunt: per totum diem enim Barney vigilias tenens observabatur permultos homines ursulos illos mulcentes, eum tamen, canem minacem, nemo fere palpare auderet.

Scripsit Nanompouphos



Retro ad:

Novissima editio
Summum paginae