De impetu in Gazam

Sedes ministri primarii Palaestini Ismail Haniyeh, qui illo tempore aberat, noctu igneo missili percussa est, de caelo a militibus Israelianis deiecto; non aliter superiore die diruta erant aedificia ministri rebus internis addicti. Minister primarius ipse ex ONU et Foedere Arabico vehementer postulavit, ut finis impetui Israelianorum imponatur, quo signa populi Palaestini icta essent. Rectores Israeliani aiunt illuc incursus in regionem Gazae a se iussos contendere, ut libertas militi concivi suo Ghilad Shalit restituatur, ante septimanam ab ignotis Palaestinis erepto, cuius usque ad liberationem nulla intermissio roboris exspectanda sit. Hamas, factio quae legitime Auctoritatem Palaestinorum regit, eius ministri omniaque instituta Hamas connexae destinata missilium Israelianorum facta sunt, quod militis raptus socii omnes Hamas asseclae habeantur.

Impetu tamen perfecto per radiophoniam nuntiatum est libertatem octo ministris Palaestinis, viginti senatoribus et nonnullis factionis legatis ultimis diebus ab exercitu comprehensis restitui posse, postquam domum miles redierit.

Scripsit Herimannus Novocomensis